La dumengia èn dapi mais puspè rivadas furniziuns d’agid a Gaza. Quai suenter che la communitad internaziunala ha fatg squitsch sin la regenza israeliana. Tuttina resta la situaziun precara. La cifra da persunas che moran da la fom è creschida fermamain, ha communitgà l’organisaziun mundiala da sanadad WHO.
Avant bunamain in’emna han 28 ministers e ministras da l’exteriur – tranter auter era la Svizra – suttascrit in appel che pretenda ina finiziun immediata da la guerra e crititgescha co che l'Israel va enturn cun l’agid umanitar. Quai na bastia dentant betg, di il cusseglier naziunal da la partida socialdemocrata, Jon Pult. La Svizra haja fin ussa fatg ina nascha figura, manegia il politicher grischun. I saja necessari che la Svizra prendia posiziun pli ferm.
La regenza da Netanjahu è ina criminala. Jeu pretend da la Svizra ch’ella sa posiziunescha pli cler. La situaziun umanitara a Gaza è in crim.
Ils crims che succedan duain vegnir numnads e crititgads pli ferm. La Svizra haja fin uss fatg ina povra figura cuntinuà Pult. Ella duai puspè star en pli fitg per ils dretgs umanitars co ch’ella fascheva ina giada.
Martin Candinas, politicher da la partida il Center, è percunter cuntent, co la Svizra ha communitgà. Candinas punctuescha la rolla tradiziunala da la Svizra sco intermediatura ed accentuescha che la Svizra duai empruvar da chattar ina soluziun diplomatica. Per pudair esser intermediatura na possa la Svizra betg clamar ora memia dad aut e stoppia tschertgar discurs cun tut las partidas per pudair defender las valurs umanitaras. Per Candinas èsi cler che la Svizra è adina encunter ina guerra e duai far tut per pudair finir quella a Gaza a moda diplomatica.
La situaziun a Gaza è fatala. Per la Svizra èsi impurtant da metter a disposiziun ina plattafurma per il dialog. Nus stuain manar ils acturs principals vi d'ina maisa.
Jon Pult pretenda che la Svizra surpiglia las mesiras ch'ils auters stadis han decidì. Necessari saja era da betg pli far commerzi d’armas cun l’Israel. El crititgescha la regenza israeliana per sias metodas militaras, che na sajan betg cumpatiblas cun las valurs umanitaras ed il dretg internaziunal.
Quests dis ha lieu ina conferenza a New York nua che differents stadis discutan davart ina soluziun pussibla da dus stadis per la regiun. La Svizra fa era part da questa conferenza.