Siglir tar il cuntegn

Header

cuntegn

Stadis Unids Accusaziuns cunter Trump sin maisa

En 34 cas duai l’anteriur president dals Stadis Unids, Donald Trump, avair sfalsifitgà documents da fatschenta. Quai renfatscha ad el la procura publica da New York. Trump saja sa declerà nunculpant en tut ils puncts. Quai rapportan medias americanas.

Donald Trump avant dretgira a Manhattan ils 4 d'avrigl
Legenda: Donald Trump avant dretgira a Manhattan ils 4 d'avrigl Reuters

In proxim termin davant dretgira a New York saja planisà il december, rapportan las medias. Il resultat dal process pudess vegnir entamez il cumbat electoral 2024, scriva il «Wall Street Journal».

Unic en l'istorgia americana

Anc mai en l'istorgia dals Stadis Unids è in anteriur president vegnì accusà pervi d’in delict. La procura publica da New York renfatscha al expresident Donald Trump ch’el haja laschà pajar ses advocat daners da silenzi ad in’actura da pornos l’onn 2016 – pia curt avant sia elecziun sco president. Quai pudess star en conflict cun reglas per finanziar il cumbat electoral. Ils puncts d’accusaziun exacts n'èn dentant anc betg enconuschents.

audio
Per tadlar: curt e cumpact
ord RTR Audio dals 31.03.2023.
laschar ir. Durada: 1 minuta 41 Secundas.

Auta probabilitad d’in process

En in proxim pass vegn il procuratur public da Manhattan ad accusar uffizialmain Donald Trump. Quai capita probablamain l'emna che vegn. Lura vegn er la publicitad infurmada davart ils detagls da l’accusaziun. Silsuenter èsi probabel ch’i dat in process. Dentant vegnan ils advocats da Trump ad empruvar tut per impedir u almain retardar in tal process davant dretgira.

Donald Trump na va betg d'accord cun las renfatschas

Trump sez ha adina puspè pretendì che las investigaziuns envers el sajan motivadas politicamain. El refusescha las renfatschas. Il republican da 76 onns vul anc ina giada candidar il 2024 sco president. Schizunt el cas ch’el vegniss davaira sentenzià, pudess el tuttina anc candidar sco president – almain teoreticamain.

Or da l'archiv

video
Accusaziun cunter Trump: New York sa prepara per protests
Or da Tagesschau dals 21.03.2023.
laschar ir. Durada: 1 minuta 11 Secundas.

RTR novitads 06:00

Artitgels legids il pli savens