Tschertas parts dals Stadis Unids fan actualmain tras il pli fraid Nadal dapi decennis. In stemprà d'enviern n'ha betg be purtà ferma cufla e vent da glatsch, mabain er temperaturas da fin a -40° Celsius. En la metropola da l'ost, a New York ha il termometer mussà -14° Celsius, a Chicago -17°.
Il dumber dals morts è entant creschì sin almain 47, da quai 25 sulet en il stadi federativ New York. L'emettur da televisiun NBC discurra sin basa d'atgnas calculaziuns perfin da 41 morts. En prest tut ils cas sajan accidents da traffic la raschun. Pertutgada il pli ferm saja actualmain la regiun enturn ils tschintg lais (Great Lakes) en il nordost dal pajais, datiers dal cunfin cun il Canada.
New York, cun ses radund 8 milliuns abitantas ed abitants, ha fatg tras ina sbassada andetga da la temperatura il venderdi. Entaifer be paucas uras è la temperatura sa sbassada da 11° plus giu sin minus 12°.
En auters lieus, per exempel ad Erie County èn las forzas da salvament durant tscherts temps stadas surdumandadas. Là è vegnì clamà si da be duvrar il numer d'urgenza en cas propi urgents che la vita è en privel, per tegnair liber las lingias da telefon. La populaziun è vegnida supplitgada da restar endadens.
Passa 1,6 milliuns chasadas – per gronda part a la costa da l'ost – sajan stadas per part senz'electricitad. L'aura ha er cruschà ils plans da bleras persunas che han vulì viagiar durant Nadal. Prest 6'000 sgols han ins stritgà il venderdi e sonda anc ina giada almain 1'500. Gist ils eroports da Chicago e Detroit, ch'èn impurtants aviunadis per viagiar en il pajais, èn stads pertutgads da la malaura.
Or da l'archiv da SRF:
SRF ha mussà online intgins dals purtrets or dals Stadis unids.
