Donald Trump ha annunzià via Twitter, ch'el e sia dunna Melania sajan vegnids testads positiv sin il coronavirus. Avant era vegni enconuschent, ch'ina da sias stretgas collavuraturas saja s'infectada. Ils davos dis è la collavuratura Hope Hicks stada bler ensemen cun el. Entant èn Donald Trump e sia dunna Melania en quarantina.
Tar glieud ch'ha stretg contact cun il president american hai schon dà plirs cas da corona – tranter auter la pledadra da medias dal vicepresident Mike Pence u il cussegliader sa segirtad Robert O'Brien.
Manar vinavant l'uffizi
Il medi persunal dal president american, Sean Conley, ha scrit en ina communicaziun, che Trump possia manar vinavant las funcziuns d'uffizi senza interrupziun. El e la First Lady restian durant la guariziun en la Chasa alva.
Pliras occurenzas publicas il davos temp
Il mardi ha Trump inscuntrà a ses concurrent per las elecziuns dal president Joe Biden en ina emissiun da televisiun. La mesemna saja el stà tar in’occurrenza da cumbat electoral a Minnesota. Durant quell’occurrenza n'hai dà nagin obligatori da mascra e las persunas sajan stadas ferm datiers in da l'autra. Millis da persunas sajan stadas al lieu. Er Donald Trump sez na porta pel solit er nagina mascra.
En ils Stadis Unids èn pli che 7,2 milliuns persunas s'infectadas cun il coronavirus. Dapli che 207'000 persunas èn mortas pervia dal virus.
