L'autoritad da l'aviatica americana prolunghescha il scumond da sgular per ils aviuns da Boeing 737 Max 9 e quai per in temp betg limità. Cunquai ston 171 aviuns restar a terra almain fin che las examinaziun da las maschinas èn terminadas.
Gia il mardi passà han las societads scuvert struvas luccas ed ulteriurs problems tar lur aviuns. Il scumond effectuescha er il traffic aviatic. United Airlines ed Alaska Airline, che sgolan omaduas cun quai tip d'aviun, han gia stuì stritgar tschients da sgols.
L'emna passada era ina porta tar la cabina dad ina Boeing 737 Max 9 rutta davent sin prest 5'000 meters autezza. L'aviun aveva uschia stuì sa tschentar urgentamain. Tenor l'autoritad da l'aviatica americana sajan quai indizis ch'il producent d'aviuns haja probabel tralaschà sias obligaziuns per inspectar e testar ils aviuns suenter la producziun.
Tar l'incident n'avevi dà nagins blessads, cunquai ch'ils sezs tar la paraid pertutgada eran vids. Suenter l’incident aveva l’autoritad che controllescha ils sgols, la FAA, gia ordinà in scumonda da sgular per quest tip d’aviun ed inspecziuns detagliadas. Las societads aviaticas n’han betg communitgà quant blers aviuns che sajan pertutgads da las struvas schluccadas.
