Charles III ha beneventà Rishi Sunak sco nov primminister da la Gronda Britannia en il palaz da Buckingham e dà l'incumbensa da furmar ina nova regenza. Ordavant aveva il retg relaschà formalmain Liz Truss da ses uffizi.
Sia regenza veglia mussar integritad, professiunalitad e responsabladad, ha ditg Sunak en ses emprim pled a la naziun.
Confidenza ston ins meritar e jau vegn a meritar Vossa confidenza.
El veglia puspè unir la Gronda Britannia e perquai saja el pront da lavurar di e notg.
Sco figl d’immigrants da l’India è Rishi Sunak l’emprim schef da regenza britannic ch'appartegn ad ina minoritad etnica: El è hinduist. E cun 42 onns è el era il pli giuven primminister dapi passa 100 onns.
Sunak sulet candidat
Sco sulet aveva l'anteriur minister da finanzas Rishi Sunak candidà per la successiun da Liz Truss. Quai suenter che gist dus concurrents da partida avevan retratg lur candidaduras: La scheffa da la chombra dals deputads Penny Mordaunt aveva annunzià glindesdi da betg candidar – l'anteriur primminister Boris Johnson aveva gia desistì la dumengia d'in comeback.
Liz Truss va suenter 45 dis
Liz Truss ha declerà sia demissiun suenter in temp d’uffizi da var sis emnas. Ella vegnia a restar en uffizi fin ch’ina successura u in successur saja vegnì nominà, ha ditg la politicra conservativa gievgia a Londra avant la sedia en la Downing Street.
Liz Truss aveva cumenzà pir l’entschatta da settember sco successura da Boris Johnson ch’aveva demissiunà suenter plirs scandals ed eclats sin squitsch da l’atgna partida. Ma gia dapi mez settember cumbatta Truss per surviver en la politica. Suenter ch’ella aveva provocà in fiasco tar ils martgads da finanzas cun ses plans per sbassar las taglias è ella stada sfurzada da midar vieuta.
En sia partida è creschida pli e pli la malcuntentientscha e la resistenza cunter ella. Tenor retschertgas èn ils conservativs circa 30 puncts procentuals davos la partida da l’opposiziun da Labour. Tar l’institut da perscrutaziun YouGov è Truss la scheffa da la regenza la pli nunpopulara dapi il cumenzament da las retschertgas.