Er anc otg dis suenter ils terratrembels en la Venezuela è in um da 43 onns ch'aveva survivì sut las ruinas d'in bajetg da set auzadas vegnì salvà. Enconuschent è er vegnì il salvament d'in buob da trais onns suenter sis dis.
Il temp dal salvament scada dentant. Anc adina èn millis persunas sparidas. Tankred Stöbe, medi d'urgenza tar Medis senza cunfins, declera tge facturs che giogan ina rolla per surviver sut ruinas.
Tankred Stöbe
Medi d'urgenza tar Medis senza cunfins
SRF News: Quant ditg po in uman surviver sut ruinas?
Tankred Stöbe: Las emprimas 48 uras èn decisivas. Suenter sa sbassa la schanza da surviver cun mintg'ura. Sutterrads èn savens sut glera e tschendra, l'oxigenaziun è uschia interrut.
Las forzas da salvament na dastgan dentant mai dar si. I dat persunas che vegnan salvadas vivas suenter trais fin quatter dis. Quant ditg ch'in uman po tegnair ora sut ruinas dependa da blers facturs.
Pertge survivan tscherts sutterrads marcantamain pli ditg che spetgà?
Sper l'apport d'oxigen e la temperatura dependa quai era dal stadi da sanadad d'in sepulì. Sper malsognas cronicas sa tschenta la dumonda davart la grevezza da las blessuras subidas. Spazis vids pon bain proteger cunter squitschadas, tgi che patescha dentant blessuras che van ensemen cun ina gronda perdita da sang, vegn a sanganar.
La fin finala vai era per quai, sch'ils sutterrads han anc insaco access a mangiativas e bavrondas. Senza nutriment pon umans viver fin duas emnas, senza liquid percunter be dus fin trais dis.
Tge èn ristgas per la sanadad che pon resultar per persunas salvadas?
Tar las blessuras èn quai ruttadiras da l'ossa, smardegliadas da parts lomas e donns d'organs. Vegnan quellas survividas vai per avair resursas nutritivas e quant ditg ch'ellas tanschan. Era la cundiziun mentala è impurtanta: tegn jau ora la tema da la mort da stuair murir mintga mument? Crai jau en l'agen salvament?
-
Bild 1 von 2. L'um da 43 onns ch'è vegnì salvà dovra uss tgira da sanadad. Bildquelle: Reuters.
-
Bild 2 von 2. La schanza da chattar survivents è pitschna suenter passa in'emna suenter la catastrofa da terratrembel. Bildquelle: Keystone.
Tge provediment dovra ina persuna salvada?
Survivents pateschan savens in uschenumnà sindrom da crush, in donn dals gnirunchels che periclitescha la vita. La raschun è ina decadenza da la musculatura da gronda surfatscha. Latiers delibereschan cellas muscularas toxins en la circulaziun dal sang, ils quals pon donnegiar grevamain ils gnirunchels. Ils pertutgads dovran urgentamain ina dialisa, ina procedura da lavar sang che dovra bler temp, ch'è dentant strusch pussaivla en ils lieus destruids sut schletta infrastructura medicinala en la Venezuela.
La Venezuela patescha ina catastrofa traidubla: Las pli grevas stremblidas dapi generaziuns tutgan sin bajetgs instabils ed in sistem da sanadad marod.
La consequenza po esser ch'ils survivents primars moran en consequenza d'in terratrembel. Mancanza da provediment medicinal, nagina opziun da dialisa, nagins antibiotica, memia paucs medicaments cunter dolurs. Tut quai èn ristgs reals en la Venezuela.
Co stattan las schanzas da prender uss anc vivs or da las ruinas?
Quai èn miraclas raras e be declerablas tras circumstanzas exteriuras spezialmain favuraivlas. La Venezuela patescha ina catastrofa traidubla: Las pli grevas stremblidas tectonicas dapi generaziuns fruntan sin bajetgs instabils che n'avessan mai dastgà vegnir construids uschè insuffizient en in territori da terratrembel.
En pli tutga il terratrembel in sistem da sanadad cumplettamain marod che n'ha gia en temps normals betg pudì proveder la populaziun e collabescha uss. Il medem mument ston ins esser conscient ch'in eveniment da tala dimensiun engrevgiass ordvart schizunt ils sistems da sanadad ils pli avanzads dal mund.