Mesemna saira han dus terratrembels ferms scurlattà la Venezuela. L'emprima stremblida ha gì ina fermezza da 7.2 e la segunda stremblida ha mesirà 7.5, quai tenor l'US Geological Survey. Entaifer pli pauc ch'ina minuta han ils terratrembels squassà la Venezuela. Ils terratrembels èn dus dals pli ferms ch'han tutgà la Venezuela dapi passa in tschientaner.
-
Bild 1 von 7. Bildquelle: AP.
-
Bild 2 von 7. L'observatori da terratrembels dals Stadis Unids di ch'i pudess dar bleras unfrendas mortalas e gronds donns. Bildquelle: EPA/ Boris Vergara.
-
Bild 3 von 7. I na dat fin uss dentant naginas cifras ed indicaziuns en chaussa. Bildquelle: EPA/ Ronaldo Pena R.
-
Bild 4 von 7. L'eroport internaziunal a Caracas ha sistì il manaschi. Bildquelle: EPA/ Ronaldo Pena R.
-
Bild 5 von 7. La presidenta Rodríguez ha appellà a tuttas las persunas qualifitgadas medicinalas dal pajais da s'annunziar en ils ospitals per gidar blessads. Bildquelle: REUTERS/ Fausto Torrealba.
-
Bild 6 von 7. Forzas da salvament tschertgan a Caracas persunas sutterradas. Bildquelle: EPA/ RAYNER PENA.
-
Bild 7 von 7. Gidanters salvan in um blessà or da las ruinas. Bildquelle: Keystone.
L'epicenter da l'emprima stremblida la mesemna a las 18:04 (temp local; 00:04 MESZ gievgia) è stà tenor las indicaziuns 24 kilometers en l'ost da San Felipe en il nordvest dal pajais sidamerican en ina profunditad da 21,9 kilometers. Il segund terratrembel è capità be paucs kilometers pli en il nord. Pervi da la profunditad minima dastgassan ils effects da la segunda stremblida esser pli gronds. La citad da plirs milliuns Caracas n'era latiers betg spezialmain datiers da l'epicenter, mabain dapli che 150 kilometers en l'ost da quel.
Las dimensiuns èn massivas
L'autoritad da geologia dals Stadis Unids (USGS) quinta cun destrucziuns massivas e stima il dumber da mortoris pussaivels sin 10'000 fin 100'000. A Caracas sco er en plirs stadis federativs en il nord dal pajais sidamerican hai dà donns, sco la presidenta Delcy Rodríguez ha ditg. «I dat stadis federativs ch'èn spezialmain pertutgads», ha ditg Rodríguez, tranter quels La Guaira. I haja gia dà 20 terratrembels posteriurs. En in'emprima posiziun ha ella discurrì da 32 morts e 700 blessads.
La politica e l'agid internaziunala
La regenza ha proclamà il stadi d'urgenza. La presidenta Delcy Rodríguez ha discurrì d'in «incident cun consequenzas gravantas». Prioritad hajan uss las lavurs da salvament, ha ditg Rodríguez. L'instrucziun en scola vegnia suspendida, il traffic da trens sistì. Er l'eroport internaziunal da la chapitala Caracas haja sistì il manaschi pervi da donns. Il minister da l'intern Diosdado Cabello ha appellà a la glieud da restar en lieus segirs. Suenter grevs terratrembels saja normalmain da spetgar terratrembels posteriurs che possian far sballunar bajetgs gia donnegiads, ha avertì il minister.
Er sin nivel internaziunal datti bleras reacziuns e solidaritad. Divers pajais han gia empermess agid a la Venezuela. Il president dad El Salvador Nayib Bukele ha scrit sin la plattafurma X ch'i stettian a disposiziun 300 forzas da salvament e sanitaris e 50 tonnas rauba d'agid per vegnir manada en la chapitala venezolana Caracas.
Era la Brasilia, la Republica Dominicana e l'USA han signalisà prontadad da gidar. «Nus vegnin ad esser qua per noss novs e grondius amis», ha scrit il president american Donald Trump sin sia plattafurma Truth Social – bain cun vista sin la regenza transitorica a Caracas.
Era la manadra da l'opposiziun e purtadra dal Premi Nobel da la pasch María Corina Machado scriva sin la plattafurma X: «Mes cor, mia embratschada infinita e mias oraziuns valan en questas uras da basegn per mintga famiglia venezolana.»