Ina represchentanta da l'ONU di ch'i smanatschia ina fomina en la regiun dals terratrembels. I dovria urgentamain dapli daners per che la glieud en la regiun dal terratrembel en Siria e la Tirchia na stoppia betg patir fom. Gia uss survegnan las persunas be ina mesa raziun da mangiar mintga di.
Quai di la directura dal Program alimentar mundial per l’Orient Proxim, Corinne Fleischer, envers SRF. Per dapli manchian ils daners. Concret dovria il program alimentar mundial enfin il fanadur ulteriurs 530 milliuns dollars per sustegnair la Tirchia e la Siria. Be uschia na stoppian las raziuns betg vegnir scursanidas.
La terra strembla adina puspè
Dus novs terratrembels pli ferms han scurlattà il glindesdi saira la regiun da cunfin da la Tirchia e la Siria. D'almain trais unfrendas discurran las autoritads tircas. Ed en omadus pajais hai dà en tut enturn 800 persunas blessadas, tenor indicaziuns uffizialas. Ils dus terratrembels en la provinza Hatay han gì fermezzas da 6,4 e 5,8. Avant duas emnas avevi dà dus ferms terratrembels – passa 47'000 persunas an pers la vita.
Suenter ils terratrembels desastrus en la regiun da cunfin tranter la Tirchia e la Siria strembla la terra adina puspè. Entant è il dumber d’unfrendas en Tirchia e Siria s’augmentà sin passa 47'000. Anc adina valan millis da persunas sco sparidas. Dad omaduas varts dal cunfin pudess l’aua da baiver vegnir stgarsa per ils survivents e las surviventas, cunquai che bleras lingias d’aua èn destruidas.
I manca aua da baiver en tschertas regiuns tircas
En ils territoris da terratrembel en la Tirchia e la Siria cumbatta la glieud per surviver. En tschertas regiuns en Tirchia manca aua da baiver, rapporta l'organisaziun da medis a l'agentura da novitads tudestga DPA. En auters lieus saja l'aua per part tschuffragnada cun auas persas. Tenor ils medis dovri aua da baiver ed avunda igiena. Uschiglio ristgian ins che malsognas infectusas sa derasian.
Sulettamain en Tirchia èn 84'000 chasas sballunadas u donnegiadas grevamain, ha ditg il minister per la planisaziun da citads da la Tirchia Murat Kurum. 20 milliuns persunas èn pertutgadas dad in dal «pli ferm terratrembel en il davos tschientaner en la Tirchia», tenor il president tirc Recep Erdogan.
Spezialists da salvament svizzer èn turnds
Bun in'emna suenter ils terratrembels desastrus en la Tirchia e la Siria èn ils spezialists da salvament svizzers returnads. Quels han pudì salvar ils davos dis la vita ad 11 persunas. Ils responsabels tschantschan d'ina da las pli gartegiadas acziuns. La Svizra ha tramess en Tirchia 80 spezialistas e spezialists da l'agid da catastrofa.
Ulteriurs 6 chauns e 10 persunas da l'organisaziun svizra Redog han lavurà en la Tirchia. A quels è gartegià ensemen cun l'organisaziun tirca GEA da spendrar 31 persunas vivas.
Giustia tirca tschertga responsabels e responsablas per bajetgs sballunads
Il ministeri da giustia ha dà cumond d'investigar cunter persunas ch'eran responsablas per ils bajetgs ch'èn sballunads durant il terratrembel. Las procuras publicas han gia investigà 131 persunas, cunter 113 datti in cumond d'arrest. Quai ha il vicepresident Fuat Oktay ditg envers l'agentura statala Anadolu.
UNESCO rapporta donns vi da l'ierta culturala
L'organisaziun da cultura da las Naziuns Unidas UNESCO deplorescha gronds donns vi da bains culturals entras ils grevs terratrembels en Siria e Tirchia. A l'UNESCO saja vegnì rapportà da donns enorms en la citad siriana Aleppo.
Uschia saja per exempel vegnì destruì la citadella dal 13avel tschientaner ed il souk istoric. Ins saja preoccupà pervia da la situaziun. La citad Aleppo è ina da las pli veglias dal mund. En Tirchia sajan crudads ensemen plirs bajetgs en la citad da Diyarbakir, in impurtant lieu da l'imperi roman ed osman.
En vista da la «devastaziun gigantica» possia ins salvar bler persunas
Tenor las autoritads tircas èsi vegnì tramess radund 16'000 teams da salvament en las regiuns pertutgadas. Tut en tut sajan 60'000 gidantras e gidanters al lieu, terratrembels posteriurs e l'aura impedeschian però las lavurs.
Il president tirc Recep Tayyip Erdogan ha entant proclamà il stadi d'urgenza per las 10 regiuns pertutgadas. Plinavant duain hotels en la regiun turistica Antalya vegnir averts per ils pertutgads dal terratrembel.
Chadaina da fortuna rimna daners
La solidaritad da la populaziun svizra cun las unfrendas da la catastrofa è gronda. La Chadaina da fortuna ha fin uss rimnà passa 20 milliuns francs per ils pertutgads.
