La Chadaina da Fortuna appellescha a la solidaritad per las persunas en la Tirchia e la Siria. La populaziun è tutgada d'ina catastrofa nunditga, ils terratrembels han chaschunà millis morts. Donaziuns pon vegnir fatgas suandantamain:
Retgav cunzunt per las unfrendas en Siria
La Chadaina da Fortuna prevesa d’impunder la gronda part dals daners ramassads per las unfrendas dals terratrembels en la regiun da cunfin tranter la Siria e la Tirchia per la Siria. Bleras regiuns pertutgadas en Siria sajan isoladas. En pli regia en il pajais ina guerra civila dapi dudesch onns. Quai ha ditg la directura da l’organisaziun, Miren Bengoa, en in’intervista cun il «SonntagsBlick».
Il terratrembel ch'ha squassà la Tirchia e la Siria ils 6 da favrer è in dals pli ferms en la regiun dapi 100 onns, pliras milli persunas èn mortas. Areguard ils blers edifizis ch'èn crudads ensemen saja da far quint ch'il dumber d'unfrendas s'augmentia vinavant.
Las cundiziuns difficilas, spezialmain en la Siria, che patescha dapi blers onns da las consequenzas da la guerra, sco er il fraid permanent, pon chaschunar ina situaziun anc pli dramatica en quests pajais. Las organisaziuns partenarias da la Chadaina da fortuna sajan gia mobilisadas e vegnan ad extender las activitads uschè svelt sco pussaivel.
