Tar l'accident en il Tirol dal Sid è il dumber da morts creschì sin 7 persunas. Quai ha annunzià la polizia: Ina dunna ch'era vegnida blessada saja uss morta en l'ospital ad Innsbruck en l'Austria. In automobilist alcoholisà era charrà la notg sin dumengia en ina gruppa da giuvens turists da la Germania. Sis persunas èn mortas anc al lieu.
L'automobilist sesa dapi il glindesdi en arrest. Il di suenter ses viadi alcoholisà è l'um da 27 onns vegnì relaschà ord l'ospital a Bruneck e vegnì transportà directamain en la praschun da Bulsaun. Las investigaziuns da la polizia avevan mussà che l'um aveva ina valur d'alcohol da bunamain dus promils en il sang. En pli va la polizia or da quai che l'um è charrà bler memia svelt cun l'auto.
Sco ses advocat ha ditg, stettia l'um da 27 onns mal da quai che saja capità. El na quintava betg dad esser talmain alcoholisà. Ad el smanatschan fin a 18 onns praschun.
Ord l'archiv:
RTR novitads 18:00