Siglir tar il cuntegn

Exteriur Tut las 84 unfrendas èn identifitgadas

Las autoritads franzosas han entant identifitgà tut las 84 unfrendas da l'attatga da Nizza. Quai conferma la procura publica a Paris.

Ina da las 84 victimas da l’attentat a Nizza.
Legenda: Ina da las 84 victimas da l’attentat a Nizza. Keystone/archiv

L'identificaziun uffiziala suonda reglas severas ed ha perquai cuzzà plirs dis, malgrà la procedura accelerada. La cumissiun d’experts nizzegia en da quels cas indicaziuns d’actas da pazients, infurmaziuns davart plumbas u protesas da dents sco era provas da DNA per identifitgar senza dubi ils mazzads. Tranter las unfrendas sa chattan er 3 Svizzers.

3 mais stadi d'urgenza

Entant ha l'assamblea naziunala a Paris decidì da prolungar il stadi d’urgenza per almain 3 mais. Ils conservativs levan schizunt prolungar quel per 6 mais. Ordavant aveva il cabinet gia decis da prolungar il stadi d'urgenza per 3 ulteriurs mais, pia fin ils 26 d'october. Il president franzos, François Hollande ha ditg ch'i vegnia fatg tut per proteger ils Franzos. Il di da l'attentat, ils 14 da fanadur aveva Hollande anc annunzià ch'il stadi d'urgenza scadia la fin da quest mais.

La gievgia era in Tunesian da 31 onns charrà cun ses camiun tras ina fulla da glieud sin la promenada da la citad franzosa. Dasper ils 84 morts eran er passa 300 persunas vegnidas blessadas per part grevamain.

RR novitads 18:00