Siglir tar il cuntegn

Header

cuntegn

Ucraina Nato fa quitads pervi dal conflict en l'Ucraina

La Nato, sco era ils Americans, Tudestgs, Franzos ed Englais, fan quitads pervi dal conflict da l'Ucraina. Era la Svizra è inquietada. Quai di Pälvi Pulli, la scheffa per la politica da segirezza dal departament da defensiun, envers SRF.

La ristga per in conflict armà en l'Europa è creschida. Quai è eventualmain la pli malsegira situaziun en l'Europa dapi decennis.
Autur: Pälvi Pulli Scheffa per politica da segirezza dal departament da defensiun

Per Pulli èsi ord vista dal VBS cler, che la Svizra sto era sa preparar per las consequenzas d'in conflict en l'Ucraina. La Svizra fiss pertutgada tras consequenzas economicas e dumondas da migraziun.

Discurs diplomatics cuntinueschan

Il president da la Frantscha, Emmanuel Macron, vul la dumengia saira puspè telefonar cun il president Russ, Wladimir Putin. Macron è gia s'entupà cun Putin l'emna passada a Moscau ed ha era gia telefonà pliras giadas cun Putin pervi dal conflict.

Il minister da l'exteriur american, Antony Blinken vul sa scuntrar l'autra emna cun ses collega d'uffizi russ, Sergej Lawrow. Tenor medias americanas pudess la scuntrada avair lieu a Genevra, sco gia la fin da schaner.

Conferenza da segirezza a Minca

Il conflict en l’Ucraina è era a la conferenza da segirezza a Minca il tema central. Era la Svizra fiss pertutgada dad in eventual conflict armà – tras consequenzas economicas e dumondas da migraziun. Perquai vuleva il Cussegl federal esser là cun dus represchentants. Ma il president da la Confederaziun, Ignazio Cassis, e la ministra da la defensiun, Viola Amherd, han curt avant stuì dir giu. Cassis ha corona e Amherd ha gì contact cun ina persuna ch'ha corona. Uss vegn la delegaziun svizra a Minca manada da la scheffa per la politica da segirezza dal departament da defensiun.

La presidenta da la cummissiun europeica, Ursula von der Leyen, ha crititga la politica exteriura da la China e da la Russia. Pervi da las smanatschas da la Russia envers l'Ucraina saja l'entir urden internaziunal periclità. La China e la Russia discurren en ina communicaziun d'ina «nova èra». Els veglian remplazzar las reglas internaziunalas existentas. Ils dus pajais prefereschian il dretg dal pli ferm enstagl dal stadi da dretg.

Conflict en l'ost da l'Ucraina

En la regiun da conflict en l’ost da l’Ucraina datti adina dapli violaziuns cunter la pausa da cumbat. A questa conclusiun vegnan observaturs internaziunals da l’OSZE, l’organisaziun per la segirezza e la collavuraziun en l’Europa. En la regiun nua che las truppas da l’Ucraina stattan visavi als separatists che vegnan sustegnids da la Russia hai dà tschients cas da violaziuns cunter la pausa da cumbat. Omaduas varts dattan a l’autra la culpa per questas violaziuns.

audio
Per tadlar: Las novitads da las 12:00
ord RTR Audio dals 19.02.2022.
laschar ir. Durada: 4 minutas 31 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga