Siglir tar il cuntegn

Header

cuntegn

Turissem Svizra avertescha da viagiar en Ucraina

La Svizra avertescha turistas e turists da viagiar en l'Ucraina sch'i n'è betg exnum necessari. Il Departament federal d'affars exteriurs EDA, ha adattà las infurmaziuns correspundentas per l'Ucraina. I existia il privel d'ina escalaziun. La raschun, sajan las truppas russas e manevras militaras al cunfin tar l'Ucraina. Las tensiuns externas sajan grondas.

Ils Stadis Unids, la Gronda Britannia, il Danemarc, il Pajais Bass, la Lettonia, l'Estonia, la Nova Zelanda e l'Australia han gia supplitgà lur cumpatriots da bandunar l'Ucraina.

Invasiun pussaivla

Ils Stadis Unids avevan avertì venderdi d'ina invasiun pussaivla anc avant l'emna che vegn. Emprovas diplomaticas per surmuntar la crisa sajan en gir. Il president american, Joe Biden, ed il president russ, Wladimir Putin vulan telefonar sonda. Er il president franzos, Emmanuel Macron vul discurrer cun il schef dal Kreml.

Per tge vai en il conflict tranter l'Ucraina e la Russia

Avrir la box Serrar la box

Sur tut vai per pretensiuns da territori, dentant er per interess economics. L'Ucraina ch'è nà da la surfatscha, prest 100'000 kilometers quadrat pli gronda che la Spagna, è encugnada tranter il cunfin da l'ost da l'Uniun europeica (Pologna, Slovachia, Ungaria, Rumenia) e la Russia. Enfin il 1991 era l'Ucraina ina da 15 republicas da l'Uniun sovietica. Dapi che lezza è vegnida schliada èn quellas republicas daventadas agens stadis. L'Estonia, la Lituania e Lettonia tutgan entant tar l'Uniun europeica e la NATO. L'Ucraina però betg.

Ina gronda part dal pievel ucranais beneventass, sch'il pajais daventass part da l'UE. Il 2013 hai dà protestas da massa a Kiew nua che la polizia ha intervegnì cun violenza. Ma i ha lura dà in moviment da massa. Il 2014 èn passa 100 persunas mortas tar demonstraziuns.

La Russia è vegnida activa ed ha annectà la Krim che tutga tar l'Ucraina da l'ost. Entras quai ha la Russia rut contracts dal dretg internaziunal, perquai ch'ella n'ha betg resguardà cunfins e l'integritad territoriala fixada.

Il conflict n'ha dapi lura betg pli chattà ruaus. En il nordost da l'Ucraina cumbattan schuldads ucranais dapi prest 8 onns encunter ils separatists equipads da la Rusia. Enturn las citads Donek e Luhansk hai dà duas republicas che n'èn betg acceptadas internaziunalmain.

audio
Per tadlar curt e cumpact
ord RTR Audio dals 12.02.2022.
laschar ir. Durada: 1 minuta 12 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga