Siglir tar il cuntegn

Header

video
Biro da la Hamas a Gaza destruì da rachetas
Or da News-Clip dals 11.05.2021.
laschar ir. Durada: 22 Secundas.
cuntegn

Ulteriuras attatgas Nagin ruaus en vista en il Proxim Orient

  • Suenter attatgas massivas cun rachetas da Palestinais militants en la Strivla da Gaza ha il cabinet da segirezza da l'Israel decidì da schlargiar sias attatgas militaras.
  • L'armada duai destruir a moda intenziunada "simbols dal reschim da la Hamas" en la Palestina, quai rapporta in emettur israelian mesemna saira.

Tenor rapports da medias èn il ministeri da finanzas en il center da la citad Gaza, sco er ina banca da la Hamas vegnidas destruidas. Il militar ha communitgà ch'aviuns da cumbat hajan destruì intgins bajetgs strategicamain impurtants sco er attatgà in commando da la marina da la Hamas. Las attatgas sin miras terroristicas vegnian cuntinuadas.

Ulteriuras attatgas durant la notg

Cur suenter hai dà a Tel Aviv la gievgia bun'ura danovamain alarms da rachetas. Tenor indicaziuns d'ina reportra da l'agentura da novitads tudestga DPA, haja dà almain in'explosiun. Tenor rapports da medias haja dà er en il nord dal pajais alarms da rachetas.

Gia avant avevan Palestinais militants sajettà mesemna saira tozzels rachetas sin citads israelianas, tranter auter Aschdod ed Aschkelon a la costa da la Mar mediterrana. Er en la regiun enturn Tel Aviv han las sirenas adina puspè sunà. En la citad da cunfin Sderot è in buob da tschintg onns mort, pervi d'ina racheta, rapporta l'administraziun da la citad.

Menders cumbats dapi guerra da Gaza il 2014

Dapi glindesdi saira sajettan Palestinais militants massivamain cun rachetas sin l'Israel. Igl èn sguladas gia passa 1'000 rachetas. Enfin uss han sis persunas pers lur vita e passa 200 èn vegnidas blessadas.

L'armada israeliana ha reagì, tenor atgnas indicaziuns, cun in bumbardament il pli vast dapi la guerra da Gaza dal 2014. Il ministeri da sanadad palestinais ha rapportà da 65 morts e plirs tschients blessads.

L'Ost da Jerusalem

Avrir la box Serrar la box

La situaziun en l'Ost da Jerusalem è gia dapi l'entschatta dal Ramadan fitg tendida. Blers Palestinais èn ravgentads, perquai che la polizia da l'Israel ha bloccà la citad veglia. Plinavant vulan autoritads israelianas stgatschar palestinais ord lur chasas en il quartier Scheich Dscharrah a Jerusalem per far plaz a colonists gidieus.

Il status da Jerusalem è in dals puncts centrals dal conflict dal Proxim Orient. Il 1967 ha l'Israel conquistà durant la guerra da sis dis la part da l'ost da la citad. Il 1980 ha l'Israel alura annectà uffizialmain il territori a Cisjordania. Il territori vala sco territori occupà. La communitad internaziunala na renconuscha betg l'Ost da Jerusalem sco territori israelian

Stat la guerra gronda avant la porta?

Internaziunal èn creschids ils quitads per in'escalaziun dal conflict. Il minister da defensiun Benny Gantz ha fatg cler a la populaziun da sa preparar per in'acziun militara pli lunga. Las Naziuns Unidas han avertì il Cussegl da segirezza da l'ONU dad ina guerra pli gronda, han declerà diplomats.

Ils Stadis Unids han entant bloccà ina posiziun communabla dal gremi il pli pussant da las Naziuns Unidas davar la violenza escalada en il Proxim Orient.

Biden accentuescha il dretg d'Israel da sa dustar

Il president american ha accentuà il dretg da l'Israel da sa dustar. La Chasa alva ha communitgà mesemna saira che Biden haja telefonà cun Netanjahu ed haja sentenzià las attatgas da rachetas da la Hamas ed autras gruppas terroristicas. Plinavant haja il president american sincerà ses sustegn «per la segirezza d'Israel e per il dretg legitim da l'Israel da sa dustar e da proteger ses pievel».

Cassis pretenda stop da la violenza

Il cusseglier federal Ignazio Cassis ha pretendì in stop immediat da l'escalaziun en il Proxim Orient. La Svizra appelleschia sin Twitter a tuts da respectar ils Dretgs umans internaziunals.

RTR novitads 06:00

Artitgels legids il pli savens