- Ursula von der Leyen è nova presidenta da la cumissiun europeica. La Tudestga succeda a Jean-Claude Juncker.
- Il parlament d'Europa ha elegì il glindesdi saira la politicra da la CDU cun ina stgarsa maioritad en uffizi.
- La Tudestga da 60 onns ha survegnì en total 383 vuschs e ha uschia surpassà la maioritad absoluta per sulettamain nov vuschs.
Per vegnir elegida ha Ursula von der Leyen duvrà la maioritad absoluta dals 747 parlamentaris. Pia ha la tudestga duvrà almain 374 vuschs – quella maioritad ha ella surpassà mo per pauc.
Von der Leyen na valeva betg sco top-candidata sin il post. Atgnamain era previs ch'ina persuna or da las retschas dals top-candidats daventa nov president da la cumissiun europeica. Da quels n'ha dentant nagin pudì persvader il parlament d'Europa.
Ord quest motiv han ils schefs da stadi nominà la ministra da defensiun tudestga von der Leyen per il post. La midada da principi en il parlament è vegnida crititgada fermamain. Cunzunt ils parlamentaris da la SPD han s'exprimì cunter la decisiun. Von der Leyen entra probablamain il 1. da november en uffizi.
Pled d'annunzia per finamiras da clima
En ses pled d'annunzia il glindesdi a bun'ura ha la Tudestga affirmà l'unitad europeica. Be unifitgada possia l'Europa sa far valair, uschia von der Leyen en il parlament a Strasbourg. Ella aveva danovamain confermà sia empermischun per ina Europa neutrala al clima fin il 2025 e da sbassar ils gas cun effect da serra per fin 55% fin il 2030.
Ina ulteriura finamira per von der Leyen èn pajas minimalas en l'entira Europa. «Mintga persuna che lavura a temp cumplain ha il dretg da survegnir ina paja minimala che tanschia per viver», ha ditg von der Leyen.
Spustar il Brexit fiss pussibel
Plinavant ha Ursula von der Leyen empermess ch'ella veglia era ch'ils concerns d'internet stoppian pajar ina faira taglia. Profits sajan bain en urden, sch'ils concerns profiteschian dentant sulettamain da las cundiziuns en l'Europa na giaja quai betg. Era fiss ella pronta da spustar il Brexit, e che l'Europa stoppia far dapli per ils fugitivs ed il spendrament sin la Mar Mediterrana.
RR novitads 12:00+
