Exteriur - Ussa vul Trump puspè far part al TPP

Il president american Donald Trump lascha sclerir pass per eventualmain puspè aderir a la cunvegna da commerzi transpacifica (TPP). Per propi aderir dovria quai però anc meglieraziuns substanzialas, communitgescha Trump.

Sche Trump avess puspè d'aderir ils Stadis Unids a la cunvegna, fiss quai ina midada d'opiniun totala. Sco ina da las emprimas acziuns entrond en l'uffizi dal president aveva el visà la cunvegna. La cunvegna era vegnida realisada anc sut l'antecessur Barack Obama cun la finamira da tegnair a mastrin l'influenza commerziala da la China en il spazi pacific.

Tge è la cunvegna TPP?

Personen-Box aufklappenPersonen-Box zuklappen

La cunvegna commerziala transpacifica prevesa da stritgar ils dazis per products agrars ed industrials. Part a la cunvegna fan anc l'Australia, il Brunei, il Chile, il Giapun, il Canada, la Malaisia, il Mexico, la Nova Zelanda, il Peru, Singapur ed il Vietnam. Ella era vegnida suttascritta il 2016 da 12 stadis (lura anc cumprais ils Stadis Unids). Suenter la retratga americana han ils 11 stadis suttascrit ina cunvegna reducida: il CPTPP che cumpiglia in martgà communabel cun 500 milliuns abitants.

RR novitads 07:00