La nav a containers «Ever Given» ch'ha bloccà durant dis il Chanal dal Suez en l'Egipta, è puspè libra. Il gestiunari dal chanal SCA ha communitgà, ch'il traffic tras il chanal – ch'è uschè impurtant per la navigaziun globala – saja puspè pussaivel.
La nav a containers ch'è radund 400 meters lunga ha durant radund in'emna bloccà la via ad entant radund 370 navs ed uschia procurà per retards en il commerzi mundial e tar chadainas da furniziun. Las consequenzas da la bloccada pudessan avair in effect anc durant mais sin il traffic da rauba maritim.
Il 2020 bunamain 19'000 navs
L'emna passada aveva la nav «Ever Given» fatg naufragi en il Chanal da Suez, ed uschia bloccà la ruta da commerzi impurtanta en omaduas direcziuns. Il chanal da 193 kilometers lunghezza è la colliaziun la pli curta tranter l'Europa e l'Asia, ed in impurtant corridor per transportar ieli ed autra rauba en l'Europa.
L'onn 2020 han var 19'000 navs nizzegià la via navigabla. Tras la bloccada ha il stadi egipzian pers mintga di entradas da 13 fin 14 milliuns dollars.
