Suenter tschintg dis han las locomotivistas ed ils locomotivists en Germania terminà lur chauma. Suenter ils trens da vitgira curseschan er ils trens da persunas puspè tenor urari. Mesemna ha la chauma en il traffic da persunas cumenzà, radund 80% dals trens èn stads pertutgads.
La notg sin dumengia èn la Viafier tudestga ed il sindicat sa cunvegnids da terminar la chauma anticipadamain. En pli na duaja dar naginas chaumas fin ils 3 da mars. Fin lura duajan er las tractativas davart las tariffas esser terminadas. Las locomotivistas ed ils locomotivists pretendan dapli paja, ina premia per gulivar la chareschia ed ina reducziun dal temp da lavur.
La chauma era planisada enfin glindesdi a las 18:00. Il sindicat dals locomotivists e da las locomotivistas tudestgas GDL pretenda tranter auter in plan da temp concret per reducir il temp da lavurar da l'emna sin 35 uras enfin 2028. E quella reducziun da 38 uras sin 35 uras senza reducziun da paja è il punct decisiv en las tractativas tranter il GDL e la Viafier federala tudestga.
