Festas da partidas - In viva sin la fin dal cumbat electoral

Suenter emnas e mais cun da cumbat electoral cun dar intervistas e discurrer cun la populaziun – è il di d'elecziun passà. Las partidas han festivà lur victorias u lura laschà consolar.

PS e la Verda: pon sa legrar

Sper la reelacziun da lur cusseglier guvernativ en uffizi Peter Peyer han ils Socialdemocrats e la Verda gì motiv da festivar pervia dal parlament. Là han els augmentà lur sezs da 18 sin 27 e la Verda prenda per l’emprima giada plaz en il Cussegl grond. Inqual viva sin quai hai dà en il restaurant Marsöl en la citad veglia da Cuira. Ma sa ruassar sin il success na vulan las duas partidas betg. Era ils proxims quatter onns vulan els procurar per in Grischun pli verd, social e progressiv.

PPS: in egl larmant ed in rient

La quarta giada en fila ha la Partida populara dal Grischun pers tar las elecziuns per la regenza grischuna. Il candidat da quest onn Roman Hug n'è betg vegnì elegì sco cusseglier guvernativ. Tuttina ha la partida era gì raschuns da sa legrar: la PPS ha gudagnà 16 sezs en il Cussegl grond, ed è cunquai la gronda victura en il parlament. Quai po cumpensar in zic la terrada da las elecziuns per la regenza e fa en mintga cas curaschi per il futur, uschia han ditg las represchentantas e commembers da la PPS a lur festa suenter las elecziuns.

Verdliberals e PLD: festa porta a porta

La Partida verd-liberala e la Partida liberaldemocratica festiveschan pli u main porta a porta. La PVL celebrescha lur 7 sezs en il Cussegl Grond, els han cuntanschì da furmar ina fracziun. En il restaurant La Vita baivan commembers e las commembras in apero e persequiteschan l’intervista da lur presidenta, Géraldine Danuser en la televisiun. Trais pass vinavant en la curt da l'Hotel Stern sa ha chattada la partida liberaldemocratica. Els festiveschan Martin Bühler che ha fatg cun remartgablamain bleras vuschs il pass en la regenza. Er sch’els han pir nov sezs en il cussegl grond è l’atmosfera allegraivla.

AdC: plaschair da la terza dunna en regenza

Carmelia Maissen ha pudì prender encunter gratulaziuns a Glion, tranter musicas e chant da chors. Per ella in di cun bleras emoziuns, damai ch'ella banduna in lieu cun interessantas sfidas per ir en regenza. Per l'Allianza dal Center èsi in di da success cun ina maioritad da trais persunas en regenzas, dentant er da l'autra vart in di pli pauc legraivel cun quai ch'ella ha laschà bleras plimas en il parlament.