Siglir tar il cuntegn

Header

cuntegn

Pierin Vincenz Process da recurs ha lieu il pli buaud il fanadur 2024

La procedura d'appellaziun en il cas enturn l'anteriur schef da la Raiffeisen, Pierin Vincenz ha lieu il pli baud proxim onn il fanadur. Raschun è tenor la Dretgira superiura da Turitg la «dimensiun extraordinaria» dal cas.

L'examinaziun da las actas fitg vastas da l'emprima instanza, la dretgira districtuala, saja betg pussibel da realisar pli baud il process. Sulet la sentenzia en scrit ha 1'200 paginas.

L'anteriur schef da la Raiffeisen, Pierin Vincenz e l'anteriur schef da l'Aduno, Beat Stocker aveva la dretgira en l'emprima distanza declerà sco culpants. Las persunas ch'eran vegnidas accusadas ensemen cun els dus ed hajan gidà da far transacziuns illegalas ha la dretgira sentenzià a chastis da daners. In accusà è vegnì acquittà.

Vincenz ha survegnì il schaner l'argumentaziun da la sentenzia

273 dis suenter la sentenzia en il cas Pierin Vincenz, han las partidas involvidas survegnì il schaner l'argumentaziun da la sentenzia. I sa tracta d'ina ovra da 1'200 paginas da la dretgira regiunala da Turitg.

L'avrigl aveva la dretgira sentenzià l'anteriur schef da la Raiffeisen, Pierin Vincenz, a 3 onns e 9 mais praschun. Quai tranter auter pervi da renfatschas da cugliunaria en l'autezza da milliuns. L'argumentaziun a scrit ch'avess gia gì da suandar la stad è vegnida spetgada cun tensiun. Singuls observaturs dal process han numnadamain stimà ch'il verdict saja fitg dir.

Sin 1'200 paginas vegn uschia colurà nair ils nums da persunas involvidas. Numerus rapports ch'èn cumparids mussan dentant, che pliras chasas da medias han gia retschavì la sentenzia – betg anonimisada.

Il davos pled en il cas n'è dentant anc betg pledà. La defensiun da Vincenz ha gia daditg annunzià ch'ins fetschia recurs tar la proxima instanza. Las partidas han uss 30 dis peda da recurrer tar la dretgira superiura da Turitg.

audio
Per tadlar: curt e cumpact
ord RTR Audio dals 12.01.2023.
laschar ir. Durada: 1 minuta 9 Secundas.

RTR novitads 06:00

Artitgels legids il pli savens