Siglir tar il cuntegn

Header

audio
Il process Raiffeisen-Aduno è a fin – in'analisa
Or da Actualitad dals 23.03.2022.
laschar ir. Durada: 5 minutas 11 Secundas.
cuntegn

Analisa Tge spetga Pierin Vincenz?

Il process è a fin: Durant otg dis han ils inculpads, lur defensurs e la procura publica rasà ora ils arguments pro e contra ina condemnaziun. Qua ina survista dad elements che distgargian ils inculpads u che pledan per ina condemnaziun:

Pertge pudess Pierin Vincenz vegnir liber?

  • Plirs parairis da professurs da num e pum distgargian Pierin Vincenz ed ils auters inculpads.
  • In donn, respectivamain ina sperdita da daners, è la premissa per accumplir il delict d’engion. Ma in tal donn n’hajan la Raiffeisen e l’Aduno gnanca gì cun cumprar las quatter firmas nua ch’ils inculpads possedevian participaziuns zuppadas – gliez din ils defensurs.
  • Ed era Pierin Vincenz insumma participà vi da tuttas quatter firmas? Mussaments existan be per la firma Commtrain. Tar las autras trais firmas sa basa la procura publica sin indizis.

Pertge pudess el vegnir sentenzià?

  • Mussaments nair sin alv datti areguard las spesas: Sco anteriur schef da la Raiffeisen ha Pierin Vincenz laschà pajar la banca visitas en clubs, cabarets e viadis da vacanzas.
  • Mussaments existan era che Pierin Vincenz possedeva participaziuns da la Commtrain ch'el tegneva tschelà a sias uras – cura ch'el era president da l'Aduno, e lezza aveva cumprà la Commtrain.
  • Tenor la procura publica datti abundantamain indizis che Pierin Vincenz possedevia participaziuns zuppadas era da l’Investnet, la Genève Credit & Leasing e da la Eurokation – che l'Aduno u la Raiffeisen han cumprà.

La difficultad per ils trais derschaders

Tenor la procura publica èn ils indizis buns e spess avunda per mussar che Pierin Vincenz ha cugliunà u sfraudà. Il defensur Lorenz Erni di il cuntrari – i sa tractia mo da fantisims da la procura publica.

Suenter il process ston ils derschaders uss giuditgar tut quai. La gronda difficultad è da decider, schebain ils indizis bastan propi per ina condemnaziun u betg.

Claudia Cadruvi

Claudia Cadruvi

Redactura RTR

Avrir la boxa da profil Serrar la boxa da profil

Claudia Cadruvi lavura sco reportra tar RTR. Ella rapporta dals pli differents temas da l'actualitad - en spezial per l'actualitad al radio.

RTR actualitad 12:00

Artitgels legids il pli savens