Il schaner ha cumenzà il process cunter l'anteriur schef da la banca Raiffeisen Pierin Vincenz. Avant la Dretgira districtuala da Turitg stattan en tut set persunas: Pierin Vincenz, sco anteriur schef da la Raiffeisen ed anteriur president da l’Aduno, e Beat Stocker, oriundamain cusseglier d’administraziun da l’Aduno e cussegliader da la Raiffeisen. Sper ils dus accusads principals stattan anc tschintg persunas avant dretgira che hajan gidà Vincenz e Stocker.
Las renfatschas da la procura publica
- Engion: Els hajan cugliunà malignamain la Raiffeisen e l’Aduno. Els sajan s’enritgids, cura che la Raiffeisen e l’Aduno hajan cumprà quatter firmas.
- Fraud e sfalsificaziun: Els hajan malduvrà lur cartas da credit da la Raiffeisen e da l’Aduno per spesas smesiradas e nungiustifitgadas.
- Corrupziun: Els hajan unschì u sa laschà cumprar.
Ils chastis che la procura publica pretenda
- Sis onns praschun per Pierin Vincenz e Beat Stocker.
- Pierin Vincenz duai restituir spesas da radund 560’000 francs e profits da radund 8,4 milliuns da venditas da firmas.
- Beat Stocker duai restituir radund 16 milliuns francs.
- Ils tschintg gidanters duain survegnir chastis cundiziunads – praschun u en daner.
I vala presumziun d'innocenza
Avant quatter onns èn Pierin Vincenz e Beat Stocker stads per 106 dis en arrest d’inquisiziun. Dapi lura èn els strusch pli s'exprimids en la publicitad. Las medias han dentant rapportà da detagls picants da l’act d'accusaziun. La vista dals accusads è vegnida a la curta – era perquai ch’els han refusà per exempel sin dumonda da RTR da prender posiziun.
Impurtant è perquai: I vala la presumziun d’innocenza entant che la dretgira n’ha betg sentenzià ils accusads.
Crap da stgarpitsch per l’accusaziun
La difficultad per l’accusaziun en quest process è il delict d’engion. Vincenz e Stocker possedevian participaziuns zuppadas vi da quatter firmas e la procura publica renfatscha ch’els hajan intimà a moda raffinada la Raiffeisen u l’Aduno da cumprar questas firmas.
Per ch’il delict d’engion saja accumplì, sto la procura publica mussar si ch’ils accusads han cugliunà cun malizia ed intenziun. Da demussar malizia n’è betg simpel. Per malizia dovri in entir construct da manzegnas e stentas da manar en errur per cuntanscher in profit nungiustifitgà.
Las cumpras da questas firmas èn dentant vegnidas examinadas da controllas internas ed externas. E la decisiun finala da cumprar las firmas ha adina prendì l’entira giunta da la Raiffeisen u da l’Aduno. Ils defensurs da Vincenz e Stocker sa refereschan tranter auter sin quests puncts.
Tranter il 2006 ed il 2017 han la Raiffeisen u l’Aduno cumprà la Commtrain, la Genève Credit & Leasing, la Investnet e la Eurokaution. Pierin Vincenz e Beat Stocker possedevian aczias u participaziuns da questas firmas, senza che la Raiffeisen u l’Aduno fissan stadas infurmadas, uschia la procura publica.
