Siglir tar il cuntegn

Header

cuntegn

10 da december Midada d'urari: meglras colliaziuns en las regiuns

Cun la midada da l’urari ils 10 da december vegn la purschida dal traffic public en Grischun schlargiada. Uschia vegn per exempel introducì il tact dad in’ura per il tschancun Landquart – Vereina – San Murezzan. Sco il chantun scriva, datti era meglieraziuns en la purschida da notg per la Surselva.

En la Surselva vegnan en funcziun dapli trens novs dal tip «Capricorn», e tranter Glion e Cuira datti in ulteriur tren la damaun, uschia ch'i dat la damaun baud in tact da mes'ura tranter Glion e Cuira. Plinavant vegnan ils uraris da las lingias da bus da la Val Lumnezia, Sursaissa, Andiast e Breil optimadas.

La Surselva profita er d'ina amplificaziun da la purschida durant la notg. Da nov circulescha il bus da notg il venderdi e la sonda durant l'entir onn, e quai en tut ils lieus pli gronds da la Surselva fin a Dieni. E tranter Glion e Cuira curseschan ils trens da bun'ura en tact da mes'ura.

Meglras colliaziuns en Val Müstair

Tranter la Val Müstair e Zernez curseschan da nov autos da posta en tact d'ura sur il Pass dal Fuorn. E da l'Engiadina auta envers Chiavenna e la Bregaglia curseschan la stad dapli bus d'express per scursanir il temp da viadi a Colico e Milaun.

Dapli lingias ed in pli aut tact en la Tumleastga

Il nov urari dal bus tranter Tusaun e Razén en Tumleastga optimescha las colliaziuns cun il tact da mes'ura da la Viafier retica e porscha a las passagieras ed als passagiers colliaziuns supplementaras. Per part vegnan adattadas las lingias da bus. Plinavant vegnan introducids ulteriurs numers da lingia per render pli chapaivla la rait. Per singuls lieus, sco Seglias, Scharàns, Farschno, Pratval e Cazas, resulta in tact da mes'ura la damaun e la saira durant il temp da viadi principal da las pendularias e dals pendularis.

Meglra colliaziun dal bus da notg

Cun amplifitgar la purschida vegni tegnì quint da l'augment da la dumonda durant la saira. Quest onn vegni focussà sin la lingia da Cuira – Planeiras. Cumplettà vegn quai tras ina nova purschida «on-demand» (PubliCar) per la repartiziun detagliada en il territori da Planeiras e d'ina part da la Val d'Alvra.

Tact da mes'ura la fin d'emna tranter Cuira e Turitg

E sin il tschancun Turitg – Cuira datti la fin d’emna il tact da mes’ura durant l’entir di. Tut las midadas en detagl pon ins chattar en quai document sut quai link.

audio
Per tadlar: curt e cumpact
ord RTR Audio dals 27.11.2023.
laschar ir. Durada: 59 Secundas.

RTR novitads 09:00

Artitgels legids il pli savens