Siglir tar il cuntegn

Header

cuntegn

134'300'000 francs Quint è approvà senza discussiuns – dentant cun blers desideris

Il Cussegl grond ha approvà unanimamain il quint chantunal da l’onn passà che mussa in gudogn da 134,3 milliuns francs. Durant la debatta ha quai sveglià desideris tar deputadas e deputads.

Mardi avantmezdi han deputadas e deputads fatg curtas e tractà a moda speditiva ils detagls dal quint chantunal – remartgas n'hai strusch dà. Cun 109:0 vuschs è lura la votaziun finala er stada clera.

Tge far cun milliuns?

Il minister da finanzas Christian Rathgeb ha survegnì laud da tuttas varts per sia disciplina ed il quint zunt allegraivel da l'onn passà. In gudogn da 134,3 milliuns francs na sa chapeschia betg da sasez, surtut betg en la situaziun malguessa cun la pandemia.

I dat dentant adina dapli vuschs en il Cussegl grond che pondereschan tge far cun ils daners, enstagl da tegnair quels en cassa. Duas remartgas èn stadas d'udir en la debatta d'entrada: Per l'ina duai il chantun investir tant sco pussaivel (l'onn passà èn quai stads be 138 milliuns francs, malgrà ch'i fiss pussaivel d'investir 170 milliuns francs). Per l'autra paran reducziuns da taglia da daventar pli e pli popularas, surtut per famiglias.

Natiralmain hai er dà vuschs che han admonì dad avrir memia fitg la bursa, gist en temps nua ch'ins na sa betg co la pandemia da Covid-19 sa sviluppescha l'atun e tge consequenzas che la guerra en l'Ucraina ha en l'avegnir. Er il minister da finanzas ha – sco adina – avertì da menders temps che spetgan. E tuttina è Christian Rathgeb per ina giada er sa mussà avert per discussiuns da schluccar tschertas directivas per il quint chantunal. Questas stuess dentant ses successur Martin Bühler pigliar a mauns.

Foto dal quint chantunal
Legenda: Punct per punct discuteschan deputadas e deputads il quint – in procedere da pliras uras. RTR

Memia bler persunal tar l'administraziun?

Al cumenzament ha ina dumonda fatschentà deputadas e deputads: Quantas novas plazzas dastga il chantun insumma stgaffir? Ina incumbensa da l'anteriura PBD da l'onn 2020 pretenda in stop – la regenza argumentescha che quai na saja betg realisabel.

La citrona è struclada ora.
Autur: Christian Rathgeb Minister da finanzas

Gia uss valia la regla ch'il chantun dastgia staffir novas plazzas per maximalmain 1% da la summa da paja totala. Quai saja in stretg corset, uschia il minister da finanzas Christian Rathgeb – era cumpareglià cun auters chantuns. La finala ha il Cussegl grond decis cun 104:0 vuschs da restar tar la pratica actuala.

Gudogn da 134'300'000 francs

Il chantun Grischun ha fatg il 2021 in gudogn da 134,3 milliuns francs. Quai èn passa 50 milliuns dapli che l'onn passà. En il budget aveva il chantun anc quintà cun in deficit da var 34 milliuns.

audio
Quint final 2021 dal chantun
ord Actualitad dals 16.03.2022.
laschar ir. Durada: 2 minutas 7 Secundas.

Gia il mars ha Christian Rathgeb preschentà plain luschezza ses ultim quint sco minister da finanzas. Sia statistica mussa: Il gudogn è ils ultims onns adina vegnì pli grond sut il liberaldemocrat.

  • 2019: 54 milliuns francs
  • 2020: 82 milliuns francs
  • 2021: 134 milliuns francs

Preschentar il quint annual dal chantun saja insumma stà insatge ch'el haja adina fatg gugent. Manar las finanzas dal chantun saja in'incumbesa nobla e plinavant in privilegi.

audio
Bilantscha persunala da Christian Rathgeb en ses ultim onn
ord Actualitad dals 16.03.2022.
laschar ir. Durada: 3 minutas 18 Secundas.

Raschuns per gudogn

Raschun principala per il gudogn èn las expensas ch'èn stadas in toc pli pitschnas che previsas en il budget. Plinavant ha il resultat positiv er da far cun il fatg che la Confederaziun ha surpiglià ina gronda part dals custs da la pandemia da corona. Numnadamain passa dus terzs dals 316 milliuns francs. Ed er ils pajaments supplementars da la Banca naziunala èn stads auts, cun 93 milliuns francs.

La survista

Avrir la box Serrar la box

Las cifras dal 2021 (cumparegliaziun cun l'onn avant):

  • gudogn operativ 139,4 milliuns (78,8 milliuns)
  • gudogn total 134,3 milliuns (81,9 milliuns)
  • entradas da taglia 819,2 milliuns (836,0 milliuns)
  • Investiziuns bruttas 322,7 milliuns (339,4 milliuns)
  • investiziuns nettas 189,4 milliuns (200,5 milliuns)
  • quota statala 14,9% (14,4%)
  • grad d'autofinanziaziun da las investiziuns nettas 175,3 % (135,1%)
video
Il chantun preschenta in gudogn
Or da Telesguard dals 16.03.2022.
laschar ir. Durada: 2 minutas 50 Secundas.

La pandemia da Covid-19 ha laschà ses fastizs er en il quint dal 2021. Tenor il chantun haja la pandemia procurà per custs supplementars da brutto 316 milliuns francs. 228 milliuns da quels ha dentant la Confederaziun surpiglià. Al Grischun èn restads custs supplementars da netto 88 milliuns francs (il 2020: 60 milliuns).

«Finanzas posiziunadas bain»

Las finanzas chantunalas sajan cun quai vinavant posiziunadas bain per dumagnar sfidas futuras, scriva il Departament da finanzas. Il chantun aveva quintà en il budget che las entradas da taglia sa reduceschian il 2021 pervi da la pandemia. Las cifras mussan dentant che quai n'è betg sa verifitgà: Las entradas da taglia èn cun 819 milliuns francs be pauc pli bass ch'il 2020.

RTR actualitad 17:00

Artitgels legids il pli savens