Il gudogn da 224,6 milliuns francs il 2025 haja la GKB pudì far malgrà circumstanzas pli difficilas cun tschains pli bass. Quest gudogn solid vegn sustegnì da fatschentas d'investiziuns e da provediment.
Nus essan cuntents cun quest resultat.
Er ina da las malsegirtads grondas da l'ultim temp, la dispita da dazis americans, n'haja gì nagina gronda influenza sin l'onn da fatschenta da la banca. Il Grischun saja da questa tematica pertutgà sut la media, uschia Daniel Fust. Be 10% dals exports van en ils Stadis Unids – e cun l'export il pli impurtant dal Grischun, numnadamain il turissem, stettia bain. Ed er ulteriuras malsegirtads geopoliticas n'hajan betg propi gì in'influenza.
Ils martgads da finanzas na prendan betg uschè serius las malsegirtads geopoliticas sco ch'ins pudess atgnamain pensar.
Da quest resultat profitescha er il chantun Grischun: el survegn quest onn 103,6 milliuns francs da la banca chantunala, pia 100'000 francs pli pauc che l'onn 2024. E las investidras ed ils investiders survegnan danovamain ina dividenda da 47.50 francs per scrit da participaziun.
Cun sia nova strategia fin il 2030 vul la banca era en l’avegnir rinforzar sia posiziun en il martgà chantunal e profitar dal svilup digital. Sper simplifitgar intgins process, vuless ella porscher dapli servetschs per la clientella en furma digitala. Quai duai spargnar peda, e quella duess lura vegnir investida en la cussegliaziun persunala da las clientas e dals clients.
Tar las purschidas simplas da la banca crescha la dumonda per sustegn digital – tar discurs pretensius tranter la clientella e la banca saja dentant er vinavant giavischà in contact persunal.
La banca quinta che la cundiziun economica resta stabila e ch’il martgà da finanzas sa sviluppia en moda positiva. Perquai è la GKB optimistica e quinta per il 2026 cun in resultat en in rom sumegliant sco quel da l’onn passà.
