Siglir tar il cuntegn

Header

Dunna pli veglia che mangia in ov en pantg cun paun.
Legenda: L’acziun communabla da 2xNadal duai gidar a tut quels che n’han betg uschè bler sco auters. Keystone
cuntegn

2x Nadal En Grischun valan 15’000 persunas sco povras

En Svizra valan 8% da tuts abitants e tuttas abitantas sco povras. Calculà sin il Grischun fissan quai circa 15’000 persunas. Ina cifra trista per in pajais che vala sco ritg. Placi Degonda da la Crusch Cotschna dat ina survista davart la povradad en il Grischun.

Placi Degonda da la cussegliaziun da daivets da la Crusch Cotschna ha mintga di da far cun glieud che n’han betg tut en abundanza. Gist durant il temp da Nadal, cura ch’il consum è grond, pateschan ils povers perquai ch’els sa sentan exclus da betg pudair sa participar a quel.

Tge munta paupradad?

Ina persuna che vala en Svizra sco povra gudogna pli pauc che 2'300 francs al mais. Per ina famiglia cun 2 uffants èn quai 4000 francs. Savens vegnia la paupradad zuppada, di Placi Degonda. Medemamain saja magari in ferm sentiment da turpetg denturn, uschia ch’ins eviteschia d'acceptar agid dad instituziuns ubain dal servetsch social ed emprovia per tut pretsch da vegnir persul sur las rundas, uschè bain sco pussaivel.

La povradad po pertutgar tuts

Savens crodia la glieud en ina spirala da povradad ord in eveniment tragic. Saja quai ina spartiziun d’ina lètg, in confamigliar mort u er pervia da malsogna. Tenor Placi Degonda èn mo paucs povers, perquai ch’els sfarlattan ils daners. Bandunar puspè quella situaziun na saja betg simpel.

Blers sa decidian da prender si in credit per avair dapli daners per in mument. Dentant il plaschair restia mo curt, cunquai che pajar enavos tut fetschia la chaussa anc pli greva. Las extradas restian las medemas, constatescha Placi Degonda. El cusseglia en in tal cas d’augmentar las entradas u cun lavurar dapli ubain cun elavurar in plan da spargn.

RTR actualitad 08:00

Artitgels legids il pli savens

Scrollar a sanestra Scrollar a dretga