Amelia Ventura ha 24 onns ed è mamma da duas mattatschas da 3 e 5 onns. Ella abita en in’abitaziun dad 1,5 chombras a Turitg. L’um è svanì e paja nagins aliments, uschia ch'ella sto vegnir a strada tut persula. Cun sia lavur parziala tar ina chadaina da fast-food e cun agid dal servetsch social sto ella vegnir ora en in mais cun 1800 francs. A la fin dal mais na resta nagut pli.
Enconuscher nagut auter che la povradad
Amelia Ventura enconuscha dapi sia uffanza nagut auter che la povradad. Sco ses uffants è er Amelia Ventura creschida si senza bab. Sia mamma ha tratg si persula ella e ses fragliuns. La gronda miseria dad Amelia Ventura ha entschet cun 19 onns durant ses emprendissadi – ella è vegnida en speranza.
Jau hai in ferm sentiment da turpetg.
Ella ha rut giu ses emprendissadi per sa focusar sin sia emprima feglia. In pèr onns pli tard durant ses segund emprendissadi è capità anc ina giada il medem. A la fin dals quints ha ella gì da tgirar dus uffants, dentant senza diplom en il satg.
Volver mintga rap
Sch’Amelia Ventura va a far cumissiuns èsi da calcular francs e raps. Nua datti acziuns? Da tge poss jau desister? – Tut dumondas ch’ella fa mintga giada. Sia pli gronda tema èsi da betg pudair porscher a sias mattatschas ina uffanza normala. Per exempel ch’ellas na pon betg avair il pli nov telefonin u far autras activitads. Pertge lura pudess il privel da vegnir exclus da conscolaras e conscolars crescher, tema Amelia Ventura. Ella na mussa betg gugent la povradad, perquai ch’ella ha in ferm sentiment da turpetg.
In radi da speranza
Er sch’ella è a la fin dals quints persula datti tuttina persunas che sustegnan ella – almain psichicamain. Entras gruppas da facebook ha ella chattà persunas ch’èn en la medema situaziun sco ella. Uschia sa Amelia Ventura, ch’i dat bleras persunas ch’han medemamain da cumbatter. Sia lavur en la chadaina da fast-food plascha ad ella, perquai ch’ella sa senta bain da savair contribuir uschia insatge a la societad. En il futur vul ella far en la scola per creschids ina scolaziun en la gastronomia – dentant fin là èsi anc ina lunga via. Ella tegna dentant la dira per pudair insacura bandunar sia situaziun precara.
Nagina egualitad da schanzas per uffants
Uffant che creschan si en povradad han spezialmain grev. Malgrà ch'els fissan talentads, na pon els per exempel betg far in sport u sunar in instrument, perquai ch'ils daners mancan. Ma er socialmain han els grev: Ir ad ina festa d'anniversari n'è betg pussaivel, perquai ch'il regal che vegn spetgà, custa memia bler.
