Malgrà la situaziun economica tendida sin l'entir mund hajan ins pudì realisar in bun resultat. La Ems Chemie ha augmentà il gudogn da 461 sin 467 milliuns francs, in plus dad 1,2%. La svieuta è sa reducida per 5,8% sin 1,95 milliardas francs, cumpareglià cun l'onn 2024.
Per l'Ems Chemie ch'è ferm avisà sin l'export è la situaziun globala ina gronda sfida. Sco che la firma scriva sajan tant consuments sco er firmas malsegirtads e cun quai pli precauts quai che pertutga investiziuns. En ils Stadis Unids per exempel sajan ils pretschs per products importads pli auts. En Europa saja l'industria en in svilup. Fertant crescha en la China il sectur da tecnologia.
La situaziun globala ed il ferm franc svizzer hajan in effect negativ sin la svieuta. La gronda part da quella vegnia fatga en l'exteriur, la bilantscha vegna dentant rapportada en francs svizzers, uschia che la summa è pli pitschna.
Il ferm franc svizzer e la conjunctura instabila han in effect negativ sin la svieuta.
Sviar e novs products
Il resultat operativ hajan ins tuttina pudì augmentar. L'Ems Chemie haja reagì cun planisar baud ed optimar tranter auter la furniziun. Il products per ils Stadis Unids vegnian part gia producids là u èn exceptads dals dazis – sco products spezials impurtants. Plinavant cumpenseschan auters martgads quai ch'ins possia vender pli pauc en ils Stadis Unids. En pajais asiatics haja l'Ems pudì far bunas fatschentas.
30% da nossa svieuta faschain nus en l'Asia e quella vegnin nus anc dad auzar.
Era hajan ins pudì avrir novas spartas cun potenzial – sco per exempel la producziun da roboters. Là sviluppeschia l'interpresa tocca leva e durabla ensemen cun ils producents. Era il martgà d'autos e cunzunt d'autos electrics haja en futur ina gronda impurtanza per la firma grischuna. Passa la mesadad da la svieuta fa la Ems Chemie cun autos ed in terz da la svieuta vegn fatg en l'Asia.
Profitar pon er ils acziunaris: Il cussegl d’administraziun propona d’augmentar la dividenda sin 18,40 francs per aczia. La seda a Domat duai vinavant restar impurtanta. Ins haja investi bleras resursas ed ins veglia tar il dumber da persunal restar sin il medem livel.