- Ils Stadis Unids limiteschan il dazi supplementar pauschal sin imports svizzers da 39 a maximalmain 15% retroactivamain sin ils 14 da november.
- Da l'autra vart reducescha la Svizra dazis d'import sin tscherts products da peschs e da products agrars envers ils Stadis Unids.
- Las excepziuns ch'existan gia dals dazis supplementars dals Stadis Unids – tranter auter da farmazia, tschertas chemicalias, aur e café – restan en vigur senza midadas.
Cun questa nova regulaziun sa reducescha il dazi supplementar da fin ussa da 39% a maximal 15% per la gronda part da la rauba svizra. Tschertas excepziuns, sco per exempel per farmaceutica, chemicalias, aur e café, restan. Ultra da quai vegnan abolids ils dazis supplementars per ulteriurs products svizzers sco aviuns, parts per l'aviatica, products da gumma, cosmetica e generica, la glista detagliada vegn publitgada en il register federal american. La Svizra prenda en mira ulteriuras excepziuns.
Per products cun ina tariffa da dazi da passa 15% che valeva avant ils 2 d'avrigl 2025 vegnan puspè applitgads ils dazis originals. Intgins dazis supplementars sco per exempel sin atschal, aluminium, autos u arom na vegnan betg midads. En la decleraziun è plinavant vegnì fixà che novs dazis supplementars pussaivels sin farmaceutica e sin semiconducturs na dastgian betg esser pli auts che 15%.
Cumpetitivitad da las firmas svizras vegn rinforzada
Cun reducir ils dazis vegnia l'access al martgà en ils Stadis Unids meglierà per interpresas svizras, uschia il Departament federal d'economia, furmaziun e retschertga. Er la cumpetitivitad da las interpresas svizras vegnia rinforzada, cunquai ch'ellas hajan sin il martgà american puspè cundiziuns sumegliantas sco las interpresas da l'UE u auters partenaris da commerzi americans cun ina structura economica sumeglianta.
Il Secretariat da stadi per l'economia infurmeschia cuntinuadamain las branschas pertutgadas davart l'applicaziun da las novas regulaziuns e davart las tariffas da dazi correspundentas.
Emprims radis da speranza
Quai è capità: Ils 15 da november èsi vegnì enconuschent ch'ils Stadis Unids vulan sbassar lur dazis per imports or da la Svizra sin il nivel da l'Uniun europeica. En ina communicaziun ha il Cussegl federal engrazià explicitamain al president american Donald Trump per ses «engaschament constructiv».
Quai è vegnì negozià: La cunvegna è ina part d'ina convenziun che prevesa che la Svizra transfereschia process da fabricaziun en ils Stadis Unids e reduceschia ses surpli commerzial envers ils Stadis Unids. L'economia svizra ha garantì investiziuns en ils Stadis Unids en la valita da 200 milliardas dollars. La cunvegna pertutga tranter auter ils secturs da farmaceutica, da l'elavuraziun d'aur e da l'equipament da la viafier. Tenor la vart dals Stadis Unids duain ultra da quai vegnir reducids ils dazis svizzers sin products americans.
Quai èn las reacziuns: Il Cussegl federal ha discurrì d'ina «soluziun da success» ed ha accentuà la productivitad dals discurs cun il minister da commerzi american Jamieson Greer. Er la regenza dals Stadis Unids è sa mussada satisfatga: La Svizra haja preschentà in plan per reducir ses surpli commerzial, quai che saja vegnì valità sco pass impurtant. Surtut l'industria d'uras, da medischina e da maschinas, electro e da metal possian profitar da dazis pli bass, sco quai che l'UBS ha constatà sin dumonda da l'agentura da novitads AWP.
Cun sbassar ils dazis scroda er il dischavantatg da concurrenza per las branschas pertutgadas, en spezial envers la concurrenza da l'UE, hai gì num da la Banca chantunala lucernaisa. L'uniun tetgala da l'industria da tecnologia Swissmem vesa il deal cun ils Stadis Unids en la dispita da dazis en general positiv. Ella avertescha dentant il medem mument da speranzas exageradas, en vista a la situaziun da sias firmas commembras.
Quai è la preistorgia: L'avust aveva il president american Trump decretà surprendentamain dazis da 39% sin products svizzers – ina da las tariffas las pli autas dal mund. Quai è vegnì argumentà cun il grond deficit commerzial dals Stadis Unids envers la Svizra. Il pass ha periclità l'access dals producents svizzers da maschinas da precisiun, d'uras e da tschigulatta ad in da lur martgads ils pli impurtants.
Las interpresas èn stadas decididas da bandunar il martgà american, da surpigliar sezzas ils custs supplementars u d'augmentar ils pretschs. Economs publics avevan avertì da las consequenzas negativas per l'economia svizra. Il Cussegl federal ha reagì cun las stentas intensivas da negoziar ina tariffa da dazi pli favuraivla.
Uss èsi confermà: La Svizra ed ils Stadis Unids han chattà ina soluziun en la dispita da dazis. Ils dazis americans vegnan sbassads sin 15%. La cunvegna è vegnida a strada suenter ch'il minister d'economia svizzer, Guy Parmelin, era stà a Washington per contrahar cun l'incumbensà economic american, Jamieson Greer. Avant las medias ha il minister d'economia Parmelin preschentà ils detagls da la cunvegna e dà pled e fatg a las medias. Sin la dumonda, cura ch'il dazi giaja en vigur, n'ha Guy Parmelin betg pudì respunder. Per questa decisiun dovria anc in zic peda.
Uschia vai vinavant: Per rauba da l'Uniun europeica vala gia dapi intgins mais in dazi american ch'è 15% pli bass. Cun l'adattaziun dals dazis dastgass ultra da quai sa reducir il squitsch sin ils exportaders svizzers da transferir lur producziun en l'UE u en ils Stadis Unids.