Atgnamain fissi stà tut sin curs per exportar en grondas quantitads turtinas da nusch da Sedrun en ils Stadis Unids da l'America. La Conditoria Sedrun pudess numnadamain vender sias spezialitads tar Costco, in dals pli gronds detaglists dal mund. Il mainafatschenta Reto Schmid raquinta che da vegnir en tar in detaglist sco Costco che fetschia ina svieuta annuala da tranter 200 e 300 milliardas dollars americans, fiss sco da metter si la curuna.
Las lavurs da preparaziun per quest grond project hajan cumenzà gia avant in onn e mez. Tranter auter haja ins stuì adattar la grondezza e la cumparsa dal pachetadi da las turtinas per ch'i funcziunia per la fiera americana.
Or dal num rumantsch «turta da nuschs» daventa «mini alpine walnut cake». Las paisas ston esser tenor las leschas americanas. Ed er per la tabella nutritiva valan reglas spezialas. Quella stoppia esser fitg prominenta, en ina scrittira specifica e nair sin alv. En Svizra saja ella pli pitschna e brin sin alv, qua funcziuna quai. Tut sto esser correct per correspunder al regulativ american.
Il focus sin la fiera americana aveva La Conditoria Sedrun mess perquai ch'ins aveva l'impressiun che quella saja main sensitiva dal pretsch che las fieras en l'Europa, en spezial quella da la Germania che guarda pli fitg sin il curs dal franc.
Ussa è l'entir project cun Costco dentant en privel pervia dals dazis americans da 39%, ma betg mo quai. Sch'ins quintia vitiers la differenza dal dollar vers il franc dapi il cumenzament da l'onn ch'è anc ina giada s'auzà radund 10% fetschia quai sut il stritg ina differenza da var 50% chareschia.
Per ina turta na das ti betg ora 50% dapli. Nus n'exportain betg tech, nus n'exportain betg insatge ch'i na dat uschiglio betg sin il mund. Cler che quella turtina da nuschs è forsa unica uschia. Dentant datti anc autras fitg bleras bunas chaussas dultschas che vegnan dad auters pajais. E quai po schon periclitar l'entira fatschenta e tut.
L'interpresa sursilvana ha investì bler ils ultims onns ed ella è era creschida. Oz quinta ella radund 50 collavuraturas e collavuraturs. Quai ed era ch'il project d'expansiun cun Costco faschess ora tranter 80 e 90% da la cumpart dad export da La Conditoria Sedrun fa squitsch! Ins dovria dapli svieuta. Ins haja construì ina fabrica. Natiralmain na vegnian ins mai da vender la capacitad ch'ins sa producir. Ma sch'ins haja ussa tuttenina betg insatge ch'ins ha preparà fitg intensiv, lura ha quai ina influenza.
Reto Schmid fa quitads – ma ha ina strategia. Ins saja vi dad evaluar tschertas pussaivladads, forsa da emprim savair vender ad ina atgna firma en il Principadi da Liechtenstein. E lura ir cun dazis da l'UE vinavant en l'USA. U schizunt da la Germania en l'America.
Ma emprim saja da sclerir ed evaluar tge pussaivladads e tge regulativas ch'i dat. E natiralmain pir cura ch'ins haja quellas en detagl sappian ins dir sch'i funcziuna u sch'i na funcziuna betg. Ed uschiglio stoppian ins ponderar da metter la fiera dals Stadis Unids per il mument da la vart ed ir en auter pajais. Contacts hajan ins numnadamain gia en Canada, China e Corea dal sid.