Al Gorihorn sur Tavau è in um da 28 onns vegnì en ina lavina ed è mort, sco la Polizia chantunala ha communitgà. Ina dunna e dus umens da la Germania han intenziunà la dumengia da viandar da la Val da Flüela enfin il Gorihorn. Pervi da la pauca naiv èn las trais persunas sa decididas dad interrumper la tura da skis gist 300 meters avant la destinaziun e turnadas enavos en la val. Durant che la dunna è sa decidida da returnar sur la ruta d’ascensiun, èn ils dus umens ids sur ina spunda. Curt suenter lur partenza è rut ora ina lavina che ha sepulì l'um da 28 onns.
Ils dus camerats che han pudì mitschar, han entschavì immediatamain cun la localisaziun ed han alarmà la chadaina da salvament. Malgrà che las forzas da salvament han chattà e deliberà el svelt, è l'um mort anc al lieu.
