In automobilist ch'ha chaschunà avant 7 onns in accident mortal tranter Cuira e Domat, dastga probabel quintar cun in chasti main sever. Tenor il tribunal federal aveva la dretgira chantunala argumentà ses chasti da l'october 2021 a moda insuffizienta. Ella sto reveder sia decisiun.
Pervi da mazzament per negligientscha aveva quella dà al manischunz 34 mais praschun, da quels 17 cundiziunà. Il chasti maximal per mazzament per negligientscha munta a 36 mais. Dasper che la dretgira chantunala n'ha betg giustifitgà, daco ch'ella ha bunamain dà il chasti maximal, n'haja ella er betg resguardà la lunghezza dal process. Er quai sto ella prender suenter.
I va per in accident, capità il 2017. L'um aveva surpassà 2 autos ed era collidà cun ina dunna sin in scooter che vegniva encunter correct. Quella è morta anc en il lieu d'accident. Dasper la sentenzia pervia da mazzament, è el er vegnì sentenzià pervia da charrar en ina cundiziun inabla da charrar, e pervia da surpassament da la lescha davart ils meds narcotics.
La dretgira chantunala ha gia sbassà il chasti da la dretgira regiunala Plaun. Quella aveva sentenzià l'um a sis onns praschun.
