In u l'auter ch'ha gia vivì avant diesch onns en Lumnezia ha probabel scurlà la testa cura ch'el ha legì la publicaziun en il fegl uffizial da l'entschatta avrigl: Las adressas en l'entira Val Lumnezia ston vegnir examinadas ed adattadas. Gia il 2016 hai dà in projects sumegliant. Ed exact quai è il punct decisiv; sumegliant ma betg il medem.
Avant diesch onns è il pensum stà dad insumma avair in'adressa – per exempel tenor il num dal quartier, ed ina numer per l'edifizi, per il pli èn quellas vegnidas repartidas tenor ils numers da la segirada d'edifizis. Uss vegn l'adressaziun unifitgada, il pensum vegn da la Confederaziun. Per la Lumnezia muntia quai, ch'i dettia adattaziuns sur tut or, di il president communal Daniel Solèr.
Jau hai chapientscha ch'il project na frunta betg dapertut sin euforia. Cura che nus avain survegnì il scriver cun il pensum, n’avain nus era betg s'allegrà.
Il project procuria er per custs che la vischnanca stoppia purtar. Tenor indicaziun dal president communal muntan quels a circa 100'000 francs. Mo ussa saja quai da tschappar a mauns e far. Ins haja empruvà da là, nua pussaivel restar tar ils nums dals quartiers, betg che quels svaneschian dapertut.
Il barat cun la populaziun, lur dumondas e propostas – durant la saira per dar scleriment la fin d'avrigl – saja stà fitg impurtant, il geometer responsabel ed il schef dal departament da construcziun hajan pudì dar scleriment quella saira. Igl haja dà differentas dumondas e propostas.
Fin l'entschatta da matg èsi stà pussaivel d'inoltrar recurs. Tenor il president communal hajan ins prendì per enconuschientscha las annunzias ed ils recurs inoltrads e gia tractà quels en la cumissiun. L'entschatta da zercladur duessan las propostas vegnir tractandadas en suprastanza.
Pertge dovri ina armonisaziun da l'adressaziun?
La finamira da l'adressaziun moderna saja che mintga edifizi haja in'adressa clera e precisa tenor criteris unifitgads, di il geometer chantunal Hans Andrea Veraguth. Nov è ch'era tut ils edifizis nua che persunas passentan temp sco per exempel clavads, stallas, tegias u staziuns da pendicularas ston avair in'adressa exacta.
Pli baud hajan ins plitost repartì las adressas sin basa dal num dad in quartier. Ils numers hajan ins repartì sin basa dal numer da la segirada d'edifizis u tenor il princip da casualitad. Là nua che quai saja sa cumprovà u ch'i n'haja dà nagin squitsch dad ordvart saja quai restà fin oz uschia.
Ussa datti dentant in pensum da la Confederaziun d'armonisar las adressas. En sasez stuess il project gia esser serrà giu. Ma da la vart dal chantun sajan ins fitg culant, di il geometer chantunal, Hans Andrea Veraguth.
L'adressaziun è ina tematica magari emoziunala. Uschia dovri per part in u dus discurs dapli per chattar ina schliaziun nua che la baselgia po restar en il vitg.
E quai gartegia per la gronda part. Tut las 100 vischnancas dal chantun hajan cumenzà cun il project, ina part saja gia a fin, auters sajan anc en il process. In'adressaziun exacta ed armonisada, pia che tuts discurrian dal medem, saja fitg impurtanta, di il geometer chantunal.
En in cas urgent po in'adressa exacta e armonisada spindrar vitas.
Gist en in cas urgent saja enormamain impurtant, ch'ins chattia spert la dretga adressa – sch'i giaja per vita e mort quintia mintga secunda. Igl haja gia dà cas che l'ambulanza haja passà pliras giadas la chasa pertutgada e n'haja betg chattà il lieu fin ch'insatgi saja ì ora sin via per mussar nua ch'els stoppian vegnir.