Er l’onn passà èn bleras persunas sa drizzadas per l’emprima giada a l’Agid a victimas dal Grischun. Tut en tut hajan 501 novas persunas tschertgà sustegn – quasi uschè bleras sco l’onn avant. Il dumber total da cas saja sa reducì levamain sin 829, cunquai ch’ins haja pudì serrar giu pli blers cas. Quai ha communitgà l’Uffizi dal servetsch social.
Bunamain la mesadad da tut ils cas (47%) pertutgia violenza a chasa. Dentant saja er quella cifra ida enavos levamain - quai da 424 sin 393 cas. Il motiv persuenter na saja betg enconuschent.
Blers malfatgs cunter l'integritad sexuala
En 21% dad en tut 1'036 malfatgs vai per violenza sexuala envers persunas creschidas, giuvenils ed uffants. Ils davos onns survegnia l’Agid a victimas dal Grischun er adina dapli dumondas davart delicts sexuals online. Latiers tutgia per exempel la sextorsiun, nua che persunas pertutgadas vegnian messas sut squitsch cun fotografias e videos intims. Er giuvenils sajan pertutgads.
En situaziuns acutas saja impurtant, che las victimas sa drizzian a la centrala d'alarm da la polizia. Ultra da quai datti en il Grischun purschidas sco la Chasa da dunnas dal Grischun, il «Schlupfhaus» da l'Ospital d'uffants dal Grischun u l'ura da consultaziun Forensic Nursing en l'Ospital chantunal dal Grischun per persunas pertutgadas da violenza.