Siglir tar il cuntegn

Header

audio
Emprimas experientschas da Marc Bollmann cun il forensic nursing a Cuira
Or da Actualitad dals 08.01.2024. Maletg: RTR
laschar ir. Durada: 3 minutas 50 Secundas.
cuntegn

Forensic nursing Purschida per victimas da violenza – anonim e gratuit

Dapi il mars 2023 datti la purschida «forensic nursing» en l'ospital chantunal a Cuira. La purschida ha la finamira da gidar victimas da violenza.

Forensic nursing, per rumantsch tgira forensica. La purschida è ina sort «ura da consultaziun» per persunas ch'èn pertutgadas da violenza. Ellas vegnan cussegliadas da tgirunzas ch'èn spezialmain scoladas per accumpagnar victimas da violenza. La purschida è gratuita ed anonima. E la confidenzialitad saja il pli impurtant, di il schefmedi da l'institut per forensica a l'ospital chantunal da Cuira, Marc Bollmann.

Cusseglià 25 persunas

Dapi che la purschida è vegnida introducida a Cuira avant var in onn, han 25 persunas fatg diever da quella. Bun la mesadad dunnas, il rest umens. Victimas da violenza a chasa eran sulettamain dunnas, ils umens avevan autras blessuras, per exempel da pitgadas sin via, conferma Marc Bollmann.

La porta da la staziun forensica stat averta a tuts!
Autur: Marc Bollmann Schefmedi da l'institut per forensica a Cuira

Co funcziuna «forensic nursing»?

L'emprim che la persuna dal fatg fa durant ina consultaziun, è il discurs. Las victimas pon discurrer avertamain cun la tgirunza e raquintar tge ch'è succedì. Suenter il discurs suonda l'examinaziun corporala. La tgirunza fotografescha tut las blessuras ed autras cumprovas. Tut vegn documentà. Tge che la persuna pertutgada vul far cun ils documents - quai è lura chaussa privata.

Nus na sfurzain nagin da far in'annunzia
Autur: Marc Bollmann Schefmedi da l'institut per forensica a Cuira

Sensibilisar

La sensibilisaziun saja in punct fitg impurtant. La glieud che dovra agid duai era savair da la purschida ed ils avantatgs ch'ella porta. Il team da Marc Bollmann infurmescha e sensibilisescha ils posts che han bler e cunzunt l'emprim contact cun victimas. Per exempel la polizia chantunala, medis e medias u er il servetsch da salvament.

La speranza per il futur è, che blera glieud è sensibilisada e po far diever da la purschida.
Autur: Marc Bollmann Schefmedi da l'institut per forensica a Cuira

RTR actualitad 12:00

Artitgels legids il pli savens