En l'Ospital chantunal a Cuira datti davent dad ussa in'ura da consultaziun per victimas da violenza cun il num «Forensic Nursing». Las uras da consultaziun duain gidar a documentar abus per cumprovar quel pli tard davant dretgira. Gist victimas da violenza a chasa hajan bler difficultads da cumprovar ils delicts davant dretgira cun quai ch'i na dat naginas perditgas, scriva il chantun. Tar las consultaziuns vegnan las feridas corporalas da la victima fotografadas e la violenza psichica vegn rapportada.
Il spezial tar questa purschida è, ch'igl è independent sche vegn fatga in’accusaziun u betg. Jau sai laschar documentar, laschar pussar e suenter duvrar quests documents.
Uschia duai vegnir impedì ch'i stat pretensiun encunter pretensiun davant dretgira. Marc Bollmann, il schefmedi da l’institut per medicina forensica, di che quests documents possian vegnir duvrads davant dretgira, tar diversas instanzas u sch’ins va dapart ed ins ha uffants, per mussar si tge ch'è capità.
En blers cas n'han las persunas nagut en maun u be ina fotografia sin il telefonin ch’è betg uffiziala.
Emprima tala purschida en la Svizra tudestga
Vinavant vegnian las persunas pertutgadas infurmadas davart pussaivladads per ulteriur agid. Purschidas sumegliantas existian gia en la Svizra franzosa, en la Svizra tudestga saja l'ura da consultaziun a Cuira dentant l'emprima. Ella duai star a disposiziun gratuitamain ed en maniera confidenziala a tut las victimas da violenza psichica u corporala.
Il chantun finanziescha l'ura da consultaziun per quatter onns. En il mument vegn ella be ad esser venala a Cuira, sche la dumonda vegn ad esser gronda pudess ella er vegnir extaisa per autras regiuns dal chantun.