Ils 27 e 28 d’avrigl è l’exposiziun Agrischa per la segunda giada suenter il 2012 sin visita a Grüsch en il Partenz. Ils organisaturs spetgan radund 12’000 visitaders e visitadras.
Sco la tradiziun è, stat la sonda da l’Agrischa en l’ensaina da passa 250 vatgas da latg che sa mesiran per la premiaziun. Ils experts valiteschan las vatgas da las razzas brina originala, Holstein, Pinzgauer, la razza grischa ed il muvel taclà. La finala datti l’elecziun da la «Miss Agrischa 2024».
La dumengia avantmezdi suonda lura la chargiada d’alp, cun pli che 50 vatgas ornadas e 15 gruppas festivas. Dasper pon ils visitaders e las visitadras sa legrar da diversas autras attracziuns cun animals, in’olimpiada per famiglias – e la concurrenza cun pitschnas puras e pitschens purs che preschentan lur animal preferì cun ina poesia u cun in’istorgia.
