Ina agricultura neutrala al clima – quai è stà il tema da l'inscunter che ha gì lieu sonda passada al Plantahof a Landquart. A maun da referats, discussiuns, podis e films han ils organisaturs e las organisaturas elavurà il tema. Las raschuns e consequenzas da la midada dal clima duessan vegnir scleridas ed i duess dar ina perspectiva per l'agricultura grischuna co ch'ella pudess vegnir neutrala al clima e tge avantags che quai avess.
«Tgi è culpabel per la midada dal clima? Ils Grischuns!»
Il cabarettist Luca Maurizio ha tractà a moda umoristica la dumonda tgi ch'è culpabel da la midada dal clima ed ha la ina clara resposta: Ils Grischuns!
Co è la situaziun dal clima e tge èn las consequenzas per l'agricultura?
Martin Grosjean ha tegnì il prim referat, nua ch'el ha spiegà la situaziun actuala e las consequenzas pussiblas. El di che la scienza haja gia daditg avertì da las consequenzas che la midada dal clima haja, dentant n'hajan la societad e la politica betg agì. Uschia saja l'agricultura era pertutgada fermamain da la midada dal clima.
Chantuns da muntogna èn pertutgadas bler pli ferm da la midada da clima, els sa stgaudan dus fin trais giadas pli spert che la media globala.
In'ulteriura referenta fitg prominenta a l'inscunter a Landquart è stada la veterinaria da la Germania, Anita Idel. La co-autura dal rapport agrar mundial ha era scrit in cudesch cun il titel «La vatga n'è betg l'assasina dal clima». En quest connex avertescha ella da simplamain sentenziar la vatga. I dovria ina vista pli cumplessiva. Perquai èsi tenor ella p. ex. era faus da pavlar las vatgas cun dapli pavel concentrà per ch'ellas emettian forsa pli pauc metan.
