La Societad per credits agriculs dal Grischun sto trair en la tschinta a partir dal 2026. La differenza tranter la summa dals credits concedids e las amortisaziuns è creschida uschè ferm che la societad ha in problem cun la liquiditad. La Confederaziun na para en il mument betg pronta da spisgentar il fondo da la societad cun novs meds.
Ils meds liquids da la Societad per credits agriculs dal Grischun èn tschessads massivamain a partir da l’onn 2023.
«Ils meds liquids da la Societad per credits a l’agricultura dal Grischun èn tschessads massivamain a partir da l’onn 2023.» Quai scriva la societad en ina communicaziun en la publicaziun emnila da l’Uniun purila grischuna dals 23 da schaner 2026. La societad scriva d’avair concedì dapli daners en furma dad emprests senza tschains. Las reservas da l’uschenumnà «Fonds de Roulement » sajan perquai sa sminuidas pli svelt che previs.
La Societad per credits agriculs ha tenor atgnas indicaziuns e cun il consentiment da la Confederaziun decidì diversas mesiras per meglierar la liquiditad. Tranter auter vul ella reducir a partir da l’entschatta da l’onn 2026 la summa dals novs emprests per 10% e reducir il temp concedì d’amortisar ils credits. E la societad fa attent envers ils crediturs ch’i saja era pussaivel da pajar enavos ils credits gia concedids pli svelt.
Concedì blers emprests
Tenor il quint annual accessibel via la pagina da la Societad per credits agriculs ha la societad concedi l’onn 2024 credits en la summa da 23,6 milliuns francs. In nov record tenor las indicaziuns tar il quint e per 1,36 milliuns francs pli aut che l’onn 2023. Percunter è vegnida restituida a la societad sco amortisaziuns dals credits en il medem onn ina summa da 18,6 milliuns francs. Bain ha la Confederaziun anc sbursà l’onn 2024 e 2025 mintgamai dus milliuns francs en il fondo rullant. L’onn 2026 na vegn quai betg pli ad esser il cas, uschia che la societad sto restrenscher ses criteris per conceder credits a partir da l’onn 2026.
Impurtantas summas vegnan era concedidas sco agid da partenza per giuvnas puras e giuvens purs che surpiglian da nov in manaschi.
Renato Caviezel da la Societad per credits agriculs di che la plipart dals credits senza tschains giaja a favur da la construcziun auta en l’agricultura, pia per construir stallas ed abitadis. I dettia era creidts che vegnan concedids a giuvens e giuvnas che vulan surpigliar in manaschi. Dasperas vegnan era prefinanziadas per exempel meglieraziuns da funs, e credits senza tschains van er a projects da la promoziun economica regiunala ed auter.
Anc adina impurtant
Renato Caviezel punctuescha l’impurtanza dals credits senza tschains per l’agricultura e per l’economia regiunala grischuna – e quai malgrà ch’ils tschains ipotecars èn per il mument fitg bass. «L’agricultura è suttamessa al dretg funsil federal che definescha ina limita d’emprest per manaschis purils.» Tenor las explicaziuns da Renato Caviezel na dastgan las bancas perquai betg conceder als manaschis purils ina ipoteca che surpassa quella limita d’emprest, nun che l’inspecturat dal cudesch funsil lubeschia quai. «Nossa societad n’è betg liada a quella limita.» La societad conceda ses emprests senza tschains tenor auters criteris e po uschia serrar la largia tranter l’ipoteca, l’atgna finanziaziun ed ils custs da construcziun.
Renato Caviezel attribuescha en general a l’agricultura grischuna ina buna morala da restituir ils credits. Ed ils problems da la liquiditad na sajan era betg dad attribuir a credits concedids che ston vegnir scrits giu. «Pervia da la chareschia e novas prescripziuns tar la protecziun dals animals èn ils custs da la construcziun auta en l’agricultura creschids marcantamain.» Quai è il motiv, tenor Renato Caviezel, che la Confederaziun haja lubì avant in pèr onns da conceder pli auts credits.
Speranza vers la Confederaziun
L’impurtanza dals credits senza tschains punctuescha er il president da la Uniun purila grischuna, Thomas Roffler – malgrà ch’ils tschains ipotecars èn bass il mument. El fa medemamain attent a la limita per credits ipotecars che valia per ils manaschis purils. «Grazia als emprests senza tschains da la Societad per credits agriculs pon ins insumma finanziar projects en l’agricultura.»
Thomas Roffler è da buna speranza che la Confederaziun alimenteschia puspè ils fondos rullants e cun els era quel da la societad grischuna, uschespert che la situaziun finanziala federala sa megliereschia. Tant pli perquai che quels daners na sajan betg contribuziuns à fonds perdu, di il president da l’Uniun purila grischuna.