L'agricultura na furma betg mo la cuntrada ed il maletg da la Svizra – mabain er sia politica. Il professer per economia agrara e politica agrara a l'ETH Turitg Robert Finger di, che l'Uniun purila svizra haja segir ina gronda influenza sin la politica svizra. D'ina vart haja quai da far cun il fatg che l'agricultura e dumondas davart l'agricultura sajan simplamain ina part fitg impurtanta da la politica svizra. Bleras da las fatschentas en il parlament pertutgan gist er l'agricultura. Plinavant dettia er in grond sustegn finanzial per l'agricultura, e perquai saja l'agricultura simplamain er impurtanta en il process politic.
Da mesirar l'influenza da l'agricultura sin la politica saja dentant fitg grev. Ma i dettia in pèr indicaturs. D'ina vart la ferma represchentanza en il parlament svizzer. 38 da las 246 persunas che sesan en il Cussegl naziunal ed en il Cussegl dals chantuns han ina colliaziun cun l'agricultura.
In'auta quota da success, er grazia a la ferma represchentanza
Quai è ina represchentanza fitg ferma da la vart purila en il parlament. E quai saja fitg interessant ord differents aspects, di Robert Finger. L'emprim saja che l'agricultura saja surrepreschentada en il senn – ch'i dat dapli puras e purs en il parlament cumpareglià cun la cumpart en la populaziun. Ed er che questa cumpart è essenzialmain pli auta en Svizra ch'en ils pajais vischins. Per exempel en il Bundestag tudestg è la cumpart da las puras e dals purs main che 2 pertschient – en Svizra èn quai 15 pertschient.
Iniziativas decididas a favur da la vart purila
La represchentanza saja in factur. In segund saja il success, declera Robert Finger. Ils davos passa 10 onns haja dà ina gronda accumulaziun d'iniziativas dal pievel en il sectur da l'agricultura. E quellas vegnian savens discutadas a moda fitg controversa ed emoziunala, da l'agricultura e da la populaziun. E quasi en mintga cas èn questas iniziativas vegnidas decididas a favur da la vart purila. Ed er tar bleras autras fatschentas ves'ins che la represchentanza purila è fitg ferma, manegia Robert Finger. Per exempel sch'i va per mantegnair il budget che stat a disposiziun per l'agricultura. I dettia pia fitg blers aspects per mesirar il success politic.
Puras e purs en rollas centralas
Pertge che tantas puras e purs fan part dal parlament na sa l'expert betg exact, ma i dettia indizis: I saja segir d'ina vart l'aut grad d'organisaziun e la gestiun fitg professiunala dals process politics, er en l'Uniun purila svizra ed enturn quella. E natiralmain na saja er betg da snegar, di Robert Finger, che puras e purs han savens rollas fitg centralas er en la structura sociala en regiuns ruralas. E perquai èn els savens ils represchentants e las represchentantas che vegnan lura er elegids. Ed el agiunta ch'i saja segir ina cumbinaziun da differents facturs che mainian al resultat da l'auta represchentanza da l'agricultura en la politica. E che contribuescha uschia er al success politic da las puras e dals purs.