Or da lentiglia e favatscha pon ins far sumegliants products sco or da chicras, e quai pudess esser in'alternativa vegetala per charn. Cuntrari da las chicras crescha favatscha dentant meglier tar nus. Quai mussa il resultat da l'emprova dal Plantahof.
La massa n'hajan ins betg racoltà, ins haja dentant er betg plantà bler. En emprima lingia hajan ins vulì chattar or tge ch'i dovria per cultivar talas plantas en il Grischun. Els hajan cuntinuadamain purs che dumondian e sajan interessads ad alternativas, di Andreas Vetsch dal post per protecziun da plantas e cultivaziun dad ers dal Plantahof. Ils purs na sappian il bler betg tge cultura ch'els duessan ussa plantar, perquai che la varietad da leguminosas saja fitg gronda. L'emprova mussa ussa che lentiglia e favatscha pon vegnir cultivads – en mintga cas en la Val dal Rain da Cuira. Els vegnian er a far emprovas en posts alpins.
L'interess per culturas alternativas è grond.
Clients dessi avunda
La dumonda per alternativas svizras tar charn saja avant maun, quai conferma Manfred Baumgarnter. El è pur a Kriessern en la Val dal Rain Songagliaisa. Gia sis onns commerzialisescha el lentiglia e fava da purarias en l’entira Svizra Orientala – clients dettia avunda. Favatscha haja grond potenzial en Svizra.
