Per ils amis da las viafiers e cunzunt per ils blers entusiasts da la Viafier retica è Bravuogn in dals lieus ils pli impurtants, sch'i va per locomotivas, trens, binaris e rodaglias. La staziun da Bravuogn – sco er il traject da viafier tranter Bravuogn e Preda – tutgan tar il Patrimoni mundial da l’UNESCO dapi il 2008. Ultra da quai sa catta a Bravuogn il Museum da la viafier Alvra – in museum cun radund 27'000 visitaders per onn. Bravuogn è pia propi il «Mecca ferrofil».
Gist quai è era sa verifitgà la sonda e dumengia passada cun l'emprim inscunter dals amis da las viafiers da model a Bravuogn. Organisà quest inscunter ha il Museum da la viafier Alvra, cun ses president Roman Sommer.
Entusiassem da tuttas varts
Viafiers da model fascineschan vegl e giuvna. Quests models èn per in nunditg dumber da persunas ina grond'occupaziun – ditg auter: in hobi sco nagin auter. Cun ir tras Bravuogn e visitar ils trais lieus nua che las bleras viafiers da model eran exponidas la sonda, è bainspert stà cler che viafiers da model èn ina fascinaziun ed attracziun. Plain entusiassem eran las persunas ch'han exponì lur «art en miniatura», ma anc bler pli incantads eran ils numerus visitaders e las numerusas visitadras.
Stadas da vasair èn propi bleras ovras d’art, models da viafiers sulettamain ina giada, tocs ch’èn vegnids montads e mess ensemen cun blera pazienza, plaschair e passiun. Passiun è il dretg pled per ils amis e las amias da las viafiers da model, els ch'enconuschan mintga pitschen detagl dals exponats, e betg il davos era dals models originals ch’èn per via sin ils binaris.
Ins s'enconuscha
Cun l’exposiziun da viafiers da model a Bravuogn è era sa mussada l’immensa varietad da quest hobi, in hobi ch’è senza dubi betg in hobi bunmartgà. Cun guardar pli minuzius è era sa mussà che blers dals numerus visitaders e visitadras enconuschevan gia ils expositurs ed era las persunas che stattan al timun dals clubs da las viafiers da model. Igl è vegnì tgirà ils contacts e discurrì tranter experts.
Attratg la simpatia dals blers visitaders han cunzunt las viafiers da model dal Club da viafiers da model «Niederrhein» en la Germania, in club cun 80 commembers. Els han preschentà a Bravuogn lur pli nov model, l'implant da viafiers da model «Amarillo Mountain Rail Road» cun ina lunghezza a binaris da 24 meters ed ina largezza da model da 5 meters.
Insatge per l'egl èn sa chapescha adina era las viafiers da model che sa chattan permanent en il museum local da Bravuogn e nua ch'i dat da vesari en miniatura il trajet da la viafier tranter Bravuogn e Preda.
Sviglià il pi grond interess dal numerus public han dentant ils models da viafiers da la Viafier retica e da las SBB/VFF – construidas d’Oskar Steger da Cuira, e quai cun legos. Era qua pon ins propi discurrer da gronda art en miniatura.
Apropos numerus public: Quel era fitg internaziunal cun visitaders e visitadras che na discurrivan betg be tudestg e rumantsch, mabain er englais, franzos, spagnol, talian e schizunt norvegiais. In ulteriur mussament che viafiers da model èn ina calamita, e l'interess per ellas n'enconuscha nagins cunfins.
Bilantscha positiva dals organisaturs
Roman Sommer – ch’è stà il motor per la realisaziun da l’occurrenza da l'ultima fin d'emna a Bravuogn – ha fatg ina bilantscha positiva envers la FMR: «Nus essan surstads, impressiunads ed er intgantads che tantas persunas èn suandadas a l’invitaziun. En mintga cas faschain nus ina bilantscha positiva da quest emprim inscunter dals amis da las viafiers da model.»
Nus essan intgantads che tantas persunas èn suandadas a l’invitaziun.
Che vegl e giuven, experts e betg experts, persunas da lunsch e damanaivel han tant interess da vegnir a Bravuogn aposta per l'inscunter saja pli che be plaschaivel. Roman Sommer ha ditg: «Anc n'avain nus betg las cifras concretas tge che pertutga il dumber da las entradas». Realitad saja ch'igl haja dà la sonda da las 10:00 fin a las 12:00 500 entradas.
Perlas d'archiv per tuts entusiasts da viafiers: