Tar l’Ospital chantunal dal Grischun datti in augment d’accidents da skiunzas e snowboardists sin pista da 20%. Quai dal prim da schaner fin ils 6 da favrer, cumpareglià cun la media dals tschintg onns passads. Quai rapporta il «Tagesanzeiger» Tenor il pledader da medias, Dajan Roman, haja era dà dapli blessuras grevas. Ils ultims onns era la media tar 3%, dapi l’entschatta da l’onn èn quai gia 4,2%.
Tge èn las raschuns?
Per Dajan Roman è la pli impurtanta raschun la mancanza da naiv. Quella tesa sustegna era il Post da consultaziun svizzer per la prevenziun d’accidents (BfU). Sco il pledader da medias Christoph Leibundgut ha confermà envers il Tagesanzeiger, «na pon ins betg excluder che tscherts accidents èn d’attribuir ad ina mancanza da naiv.»
La naiv tecnica che remplazza la naiv natirala è pli dira e cumprimida, quai maina a spertadads pli autas ed uschia a pli grondas forzas tar accidents. En pli pon grips e crappa sper la pista chaschunar blessuras pli grevas che sin la naiv.
Ma las statisticas d’accidents na sustegnan betg cumplainamain quella constataziun. Sche l’aura e las cundiziuns da naiv èn schlettas, van pli paucs sin pista e quai reducescha il privel per accidents. Il pli blers accidents datti durant bell’aura e cun las meglras cundiziuns da naiv.
Curt e cumpact: in pèr cifras
- 90% dals accidents capitan per atgna culpa – senza autras persunas involvidas
- 40% dals accidents cun skis pertutgan ils schanugls
- 40% dals accidents cun snowboard pertutgan bratscha e mauns
Or da l'archiv:
