Siglir tar il cuntegn

Header

audio
Staziun d'urgenza Cuira: Sfidas cun cas da bagatellas
Or da Actualitad dals 21.01.2023. Maletg: RTR
laschar ir. Durada: 3 minutas 45 Secundas.
cuntegn

Ospitals grischuns Staziuns d'urgenza n'èn betg surchargiadas

Las staziuns d'urgenza d'ospitals en la Bassa, ubain er a Brig e Visp en il Vallais, èn stadas al limit l'emna passada. En il Grischun èn ils ospitals dentant betg uschè fitg sut squitsch.

La mancanza da naiv chaschuna che blers ospitals grischuns ston tractar auters cas. Retschertgas da la FMR mussan uss che la situaziun n'è betg uschè tendida sco en la Bassa:

  • Ospital chantunal: «Nus n'avain betg gì in chatsch sco las staziuns d'urgenza en ils ospitals da las grondas citads» ha Dajan Roman, pledader da l'Ospital chantunal grischun, ditg.
  • Ospital Engiadin'Ota: «Quest onn sur ils firads èsi stà pli hectic ch'ils ultims onns en nossa staziun d'urgenza a Samedan. Uss avain nus puspè ina situaziun pli normala,» infurmescha Patrick Egger, schefmedi e manader da la staziun d'urgenza.
  • Ospital regiunal Surselva: «Ils cas da tractament en nossa staziun d'urgenza correspundan a la media dals ultims onns,» ha il schefmedi Marcel Bundi rapportà.
  • Center da Sanadad Savognin: «Nus sentin la rusna da schaner actualmain er cun damain accidents da sport d'enviern,» ha la directura Christine Demarmels ditg.
  • Ospital da Tavau: «Noss ospital ha gì fitg autas frequenzas en la staziun d'urgenza durant ils firads. Uss avain nus in tut normal manaschi da stagiun auta d'enviern,» ha la manadra da la communicaziun Corina Issler ditg.

Plirs virus dattan lavur a medias e medis, quai è er en il Grischun betg auter. Ed er qua s'annunzian persunas cun mals plitost nunprivlus en staziuns d'urgenza. Quai haja er raschuns praticas, conferma l'Uffizi chantunal da sanadad: Pli e pli bleras persunas n'han betg in medi u ina media da chasa pli.





L'exempel da l'ospital chantual a Cuira

Il temp tranter Nadal e Bumaun saja mintg'onn fitg intensiv e quai saja era questa stagiun stà uschia, conferma Thomas Müller, il schefmedi da la staziun d'urgenza da l'ospital chantunal a Cuira. Quest enviern saja dentant in zichel auter perquai ch'els hajan pli paucs accidents da pista e persuenter dapli cas da malsogna. Quai po esser cas d'influenza, dals virus RSV e Covid u tipics cas da cun ina malsogna dal cor e da la circulaziun.

Dapli persunas van directamain sin la staziun d'urgenza

Che bleras persunas na van, tar in cas d'urgenza, betg sco emprim tar la media da chasa mabain direct en l’ospital sentian els era en il Grischun, di Thomas Müller. Quella tendenza possian ins cunzunt observar en citads pli grondas en la Bassa, adina pli fitg dentant er qua. Il schefmedi argumentescha quai uschia che bleras da quellas persunas n'hajan betg pli in medi da chasa e sajan disadas dad ir directamain sin la staziun d'urgenza. Quai fetschian ellas lura er cura ch'ellas sajan en il Grischun.

Dapli cas da bagatella

Quai vul dentant er dir ch'ils ospitals èn confruntads dapli cun cas pli simpels, uschenumnads cas da bagatella. L‘ospital chantunal haja gì l'onn passà passa 30% dapli da quels cas cumpareglià cun l'onn 2021. Tenor definiziun èn quai plajas pli pitschnas, tagls e sgrifladas. E quellas vegnan, sper ils cas pli grevs, sco emprim tractadas sin la staziun d'urgenza. Perquai ha l’ospital chantunal avert avant intgins onns ina pratica d'urgenza nua ch'ils cas pli levs vegnan spartids dals cas grevs.

En general in bun provediment da basa

La pratica è averta la saira e la notg e surpiglia lura il servetsch d'urgenza per las regiuns da Cuira e dal Plaun, Scanvetg, Flem-Laax-Falera e da la regiun da Sargans. Quella purschida duai far pli attractiva la lavur da las medias e dals medis da chasa. Er sch'ins stoppia dir ch'il provediment da basa saja guardà sur tut bun en il Grischun, di Thomas Müller. Er pervia da quai na sajan las staziuns d'urgenza probabel betg uschè surchargiadas sco en autras parts da la Svizra.

RTR novitads 07:00

Artitgels legids il pli savens

Scrollar a sanestra Scrollar a dretga