En vista als dis da Pasca sa mettan blers e bleras sin viadi vers sid ed adina daplirs ston far in stop avant il tunnel dal Gottard a Göschenen. Actualmain stattan ils autos en colonna sin ina lunghezza da 4 kilometers. Quai munta anc 40 minutas dapli temp da viadi. Recumandà vegn da guntgir sin la ruta dal San Bernardino. La pli gronda lunghezza da la colonna muntava a 21 kilometers.
Sin l'autostrada A13 en direcziun sid ha il traffic laschà suenter cunter saira, ed enturn las 6 eran las colonnas sa schliadas. La pli lunga colonna sin l'A13 il venderdi sontg muntava ad in temp da viadi pli lung dad in'ura e mesa.
Igl è da quintar cun bler traffic
Bler traffic, lungas colonnas ed impediments da traffic, quai il purtret sin las vias svizras avant e durant il dis da Pasca. Cunzunt sin il traject nord-sid da l'A2 Gottard e sin l'A13 avertescha l'ASTRA da bler traffic. Er sin vias e trajects che mainan a destinaziuns popularas d'excursiuns e sin las autostradas da la Bassa èsi da quintar cun colonnas e retards.
Tradiziunalmain cumenza il traffic da Pasca gia ina fin d'emna pli baud. Gia a partir dals 27 da mars fa l'Uffizi federal da vias quint cun dapli traffic sin las vias. Quai s'accentueschia lura a partir da mesemna, il prim d'avrigl. La gievgia sontga ed il venderdi sontg èsi d'avair pazienza direcziun sid, l'ASTRA avertescha da colonnas e lung temp da spetga en spezial davant il portal nord dal tunnel da Gottard sco er sin la ruta da San Bernardino.
Cun traffic da return èsi da quintar a partir da dumengia da Pasca. Er il glindesdi Pasca vegni ad esser bler traffic en direcziun nord. Er l'emna suenter Pasca vegnia tenor experientscha punctualmain a colonnas ed er per la fin d'emna dals 10 fin ils 12 d'avrigl prognostitgescha la Confederaziun bler traffic sin via.
Traffic da guntgida A13 – amplas duain dar dumogn
Il chantun Grischun optimescha sias mesiras da traffic sin l'autostrada per ils firads da primavaira e las vacanzas da stad. Da nov metta l'Uffizi da construcziun bassa en funcziun quatter ulteriuras amplas fixas che duain impedir che automobilistas ed automobilists svieschan il traffic sin l'A13 e charreschan tras ils vitgs per lung da l'autostrada.
Sper las amplas installescha il chantun er posts supplementars da dosar il traffic sin il St. Luzisteig, a Mastrils ed a Fläsch. Là vegn il traffic reglà a maun, scriva l'Uffizi da construcziun bassa dal Grischun. Quest dispositiv vegnia en funcziun tenor basegn.
Plazzal tranter La Punt/Rehanau e Cuira è a fin
Il plazzal sin l'A13 tranter La Punt/Rehanau e Cuira ch'ha impedì il traffic las ultimas emnas è svanì. Sin dumonda da RTR ha l'Uffizi federal da Vias (ASTRA) ditg che las lavurs sin quest tschancun da l'A13 sajan a fin. Las lavurs per lung l'autostrada vegnian fatgas en etappas.
Per la proxima etappa da lavurs vegnia installà il plazzal tranter Cuira-Nord e Zezras. Ins haja organisà las etappas uschia, ch'i na dettia nagins impediments supplementars durant ils dis da Pasca.
Per laschar passar pli svelt las uras en colonna: