Ils ultims onns è l'A13 adina puspè stada surchargiada durant ils firads da primavaira. En consequenzas hai dà colonnas e traffic da guntgida sin las vias chantunalas e communalas. I saja er sa mussà, che la cumpart dal traffic da transit haja importà main che 40 %. Passa 60% dals vehichels èn restads en il chantun u han bandunà il Grischun sur in'autra ruta, quai scriva l'Uffizi da construcziun bassa en ina communicaziun.
Sin fundament da questas enconuschientschas ha il chantun decis ulteriuras mesiras da dar dumogn al traffic. Da nov vegnan installads quatter ulteriurs indrizs d'amplas fixs. Dus da quels a Rothenbrunnen e mintgamai in a Domat ed a Panaduz.
Ina tala ampla ch'era gia vegnida installada l'onn passà sco emprova da pilot a Zezras saja sa cumprovada. Quests indrizs permettian da dosar il traffic pli baud ed a moda pli differenziada. La finamira saja tranter auter da minimar ch'il traffic guntgeschia en las zonas d'abitadi.
Il temp da viadi sin la via chantunala na duai betg esser pli attractiv che quel ch'ins ha sin l'autostrada.
Dispositiv enfin al cunfin chantunal
Sper quai extenda il chantun er ses dispositiv temporarmain. Cun ils posts da dosadi supplementars sin il St. Luzisteig, a Mastrils ed a Fläsch, che vegnan regulads a maun, po l'Uffizi da construcziun bassa reagir pli baud sin dapli traffic e stabilisar la circulaziun. Quest dispositiv vegn en funcziun tut tenor basegn. Dosar il traffic a maun e cun amplas ha suandantas finamiras:
- minimar il traffic da guntgida en las zonas d'abitadi
- stabilisar la circulaziun dal traffic sin la via naziunala A13
- garantir la circulaziun da las organisaziuns a glisch blaua e dal traffic public
- proteger la populaziun locala cunter immissiuns supplementaras
Las fins d'emna enturn Pasca, Ascensiun e Tschuncaisma ston ins far quint cun dapli traffic cunzunt durant ils temps da viadi principals.
Triascha per autos indigens n'è betg pussaivel
Da restrenscher il traffic sin las vias chantunalas e communalas mo sin persunas indigenas, n'è actualmain per motivs giuridics e pratics, strusch realisabel. Bleras da las vias pertutgadas èn suttamessas a l'Ordinaziun federala davart las vias da transit e ston perquai da princip restar avertas per il transit general. Plinavant scriva l'Uffizi da construcziun bassa che realisar talas triaschas per «persunas indigenas» saja difficil. Ins na possia betg far quai senza discriminaziun e discussiuns.