Las colonnas dad autos en il chantun Grischun sajan en emprima lingia ina dumonda da quantitad. Pia: quants autos sin ina via durant in tschert temp. Uschia declera Reto Knuchel, inschignier dal chantun tar l'uffizi da construcziun bassa, quella problematica cun il traffic.
Las consequenzas? Vias bloccadas e quai betg mo sin l'A13, mabain era tras ils vitgs che sa chattan sper las vias naziunalas. Sco per exempel Domat u Rehanau. Betg optimal – dentant nagut nov.
Mesiras a curta vista
A curta vista emprova il chantun da cumbatter quella problematica cun uschenumnads «dispositivs provisorics». Pia amplas che doseschan il traffic per reducir il dumber d'autos che va tras ils vitgs, di Andreas Pöhl, manader dal management da traffic.
Noss intent principal è la protecziun da la populaziun. E sin quai vulain nus metter pais.
Exact uschè in'ampla vegn dapi il favrer testada davant il vitg da Zezras. L'indriz para da far ses servetsch. Els sajan cuntents, di Andreas Pöhl. Ussa saja d'evaluar nua che da quellas amplas vegnissan anc en dumonda.
Mesiras a lunga vista
Il squitsch da chattar soluziuns persistentas a lunga vista è dà. La quantitad d'autos na vegnia era betg pli pitschna – il cuntrari saja perfin il cas. Tge datti lura per mesiras a lunga vista? Sco Andreas Pöhl declera, saja quai per l'ina la optimaziun dad infrastructura e per l'autra la utilisaziun. Pia, co la societad vul sa mover en futur.
Tenor Reto Knuchel, inschigner dal chantun, è la balla – quai che pertutga l'infrastructura da las vias – per il mument tar la Confederaziun.
Il Cussegl federal è per il mument vi dad evaluar nua ch'i vala da bajegiar ora las vias naziunalas.
Tge che quai munta exact, na possian els anc betg dir. Ussa dovria quai pazienza.
E co vesa quai ora cun tschella tematica: Co nus vegnin a duvrar l'auto en futur u resp. betg duvrar l'auto? Sco Reto Knuchel declera, saja quai – per il mument – grev da predir e dependia era da la societad. I dettia pliras tendenzas. Ina saja cler autos electrics ubain dad idrogen, in’autra è da promover il traffic plaun. Ina ulteriura saja d’investir dapli en ils meds publics. Tge effect che tut quellas mesiras vegnan lura propi er a lunga vista ad avair sin las colonnas, quai saja grev da stimar, di Reto Knuchel. Scenaris dettia blers.