Prognosas da traffic da Tschuncaisma
La situaziun da traffic da Tschuncaisma è sumeglianta a quella d'Ascensiun. Pervia quai fa Andreas Pöhl da l'IUffizi da construcziun bassa dal Grischun in facit da l’emna passada, per far ina prognosa da Tschuncaisma.
Las mesiras hajan funcziunà, pia che la populaziun en las vischnancas è vegnida protegida dal trafic e che las organisaziuns da glisch blaua avessan pudì circular. Da l’autra vart han els quintà 3'200 autos che han bandunà il Grischun a Bad Ragaz. Quai è in dumber fitg aut e la capacitad da la A13 era cuntanschì. Andreas Pöhl declera il suandant tar la capacitad:
- Cun 2'500 autos funcziuna il traffic anc relativamain bain – ils autos van 60 fin 80 kilometers per ura.
- Tar 3'000 fin 3'200 autos ins va anc 20 u 30 kilometers per ura. Ed a partir da qua fissi pli attractiv dad ir sur la via chantunala.
- Tar sur 3'200 autos croda il traffic ensemen.
Il ultim cas emprova l'Uffizi da construcziun bassa d’evitar cun dosar il traffic. Schon tar 2'500 autos cumenzan els da manar intgins autos sur vias chantunalas. Uschia ch’il traffic rolla vinavant sin l’autostrada. Ed entant ch’el rolla èsi pli attractiv da restar sin l’autostrada.
La fin d’emna da Tschuncaisma han els schon da cumenzar a dosar il traffic tar Landquart. Igl è cler ad el che quai detti dapli traffic tranter las vischnancas – i dat dentant naginas autras schliaziuns. Andreas Pöhl va numnadamain da quai anora, ch'i dettia dapli traffic. In motiv è che l’aura en il sid e pli bella e che intginas parts da la Germania han schon vacanzas.
Prognosas da traffic d'Ascensiun
L'uffizi federal da vias Astra ed TCS prognostitgeschan bler traffic durant las fins d'emna d'Ascensiun e da Tschuncaisma – oravant tut sin la A2 dal Gottard e sin la A13 San Bernardino. Cuntrari a l'onn passà è la via sur il pass dal Gottard gia averta, quai ch'è ina distgargia dal tunnel da via. Ultra da quai vegn avert durant tscherts dis in vial spezial che pussibilitescha in access direct al pass dal Gottard. Per il traffic che charrescha en direcziun sid saja da princip da quintar cun dapli traffic in di avant il firà sco tal sco er il firà sez:
L'experientscha mussa ch'il traffic da return vers nord sa reparta meglier sur il di ch'il traffic da vacanzas en direcziun sid. Per il traffic da return saja da quintar cun in grond volumen da traffic durant ils suandants dis:
Gia il venderdi pudess la situaziun sa calmar
Las pli lungas colonnas al Gottard sajan tenor il TCS spetgar la gievgia d'Ascensiun, scriva l'agentura da novitads Keystone-SDA. Avant in onn ha la colonna al portal dal nord dal Gottard gì ina lunghezza da 16 kilometers.
A vehichels or da la Svizra orientala e da la regiun Turitg che vulan guntgir la fermada dal Gottard recumonda il TCS la ruta A13 via San Bernardino. Quest sviament rendia spezialmain sch'il temp da spetga al Gottard surpassa in'ura.
Qua vai tar la situaziun actuala da las vias e dal traffic.
Era sin ils binaris saja da quintar cun in augment da passagiers. Sur Tschuncaisma ed Ascensiun circuleschan perquai 40 trens spezials tranter la Svizra tudestga ed il Tessin, communitgeschan las Viafiers federalas. Plinavant vegnian singuls trens rinforzads cun chars u unitads supplementaras, tranter auter era ils trens dad EuroCity che van fin l'Italia. En tut vegnian purschidas 75'000 plazzas da seser supplementaras.