Datas da quintaders da traffic da l'Uffizi federal da vias (ASTRA) mussan che mo intgins autos che entran durant ils firads Ascensiun e Tschuncaisma sin la via A13 sper Ragaz Bogn en il chantun Grischun van era vinavant en il sid tras il tunnel dal San Bernardino. Quai munta che blers autos restan en il chantun u cuntinueschan sin autras vias, scriva l'Uffizi da construcziun bassa.
A la fin dals firads sajan vegnids dumbrads dapli autos ch'èn charrads or dal Grischun en direcziun nord che autos vegnids or dal sid. Quai munta che pli pauc che 40% dals autos èn charrads simplamain tras il chantun.
Ils blers autos, passa 60%, restan en il chantun u prendan in auter traject per vegnir ord il chantun.
3'200 vehichels èn la limita a Bogn Ragaz
Durant in lavurdi regular, tranter las 17:00 e las 18:00, passan en media radund 2'300 vehichels il post da dumbraziun a Bogn Ragaz en direcziun nord. Sur Ascensiun e Tschuncaisma èn vegnids dumbrads fin passa 3'200 vehichels per ura. Cun quest volumen da traffic è cuntanschì il cunfin da capacitad da l'infrastructura da vias naziunalas. La consequenza èn stagnaziuns da traffic e colonnas sco er traffic da guntgida.
L'Uffizi da construcziun bassa dal Grischun ha prendì mesiras per diriger il traffic e per minimar guntgidas da l'autostrada sin la via chantunala. Cun questas mesiras vul il chantun meglierar la circulaziun dal traffic en ils vitgs, garantir il passagi senza impediments per organisaziuns da glisch blaua ed il traffic public. Medemamain vulan ins uschia proteger la populaziun locala cunter immissiuns supplementaras.
L'Uffizi da construcziun bassa fa l'avis ch'ins doseschia il traffic sin la via principaladavent da Landquart. Tras quai na vegn la via principala betg resguardada sco attractiva dal sistem da navigaziun e la canera e las colonnas en ils vitgs vegnian reducidas.
L'onn proxim stuain nus ponderar da dosar gia damanaivel dal cunfin chantunal
Malgrà che las mesiras èn vegnidas realisadas, hai dà colonnas sin la ruta dal San Bernardino. Tant sin la A13 sco er sin la via principala han ins stuì quintar cun gronds retards. Quels èn vegnids augmentads anc pli fitg pervia d'accidents sin l'autostrada, perquai che l'autostrada ha stuì vegnir serrada ed il traffic ha stuì vegnir svià sur la via principala.
Las adattaziuns da las mesiras vegnan fatgas en stretg barat cun las vischnancas pertutgadas. Ina emprova da pilot a Zezras cumpiglia l'installaziun d'in indriz dad ina ampla per part automatisada e per rimnar experientschas per automatisaziuns futuras.